ნამახვანჰესის მოწინააღმდეგეებმა რესპუბლიკის მოედანზე გადაინაცვალეს. ისინი რუსთაველის გამზირის გადაკეტვას გეგმავენ

ნამახვანჰესის მოწინააღმდეგეები რუსთაველის გამზირის გადაკეტვას გეგმავენ. ამის შესახებ საპროტესტო აქციის ორგანიზატორმა, ვარლამ გოლეთიანმა თავისუფლების მოედანზე განაცხადა.

"ჩვენ, რადგან სცენა გვაქვს მოწყობილი და კარვები გვაქვს გაშლილი რესპუბლიკის მოედანზე, ბუნებრივია, იმ ტერიტორიას ვერ დავტოვებთ და მივიღეთ გადაწყვეტილება, დავიძრათ რესპუბლიკის მოედანზე და იქ გადაიკეტება რუსთაველის გამზირი, არ გაიხსნება. ამავდროულად, ახლოს ვიქნებით იმ ძირითად ლოკაციასთან, სადაც დავიწყეთ ეს პროცესი და გადაიკეტება იქ ყველაფერი, ვიდრე არ შესრულდება ჩვენი მოთხოვნები", - აღნიშნა გოლეთიანმა.

ვარლამ გოლეთიანმა კიდევ ერთხელ მოუწოდა თბილისის მოსახლეობას, რომ შეურთდნენ მათ საპროტესტო აქციას.

"ეს არ არის თითო კაცის ბრძოლა, პერსონალური, ამა თუ იმ პირის ბრძოლა, ეს არის მთელი ქვეყნის პრობლემა და თითოეული ჩვენგანის ბრძოლა. ამიტომ, ამის გაცნობიერებას დასჭირდა გარკვეული პერიოდი, რომ მისულიყო ეს ინფორმაცია საზოგადოებამდე, მეტ-ნაკლებად ყველამ გავიგეთ, მაგრამ უფრო დიდი ჩართულობაა საჭირო. ამიტომ, 26 მაისს აღლუმი იქნება არა აქ და თავისუფლების განცდის შეგრძნება იქნება არა აქ, არამედ სადაც ვდგავართ ჩვენ, პროტესტის ძირითად ადგილზე და მთელი დედაქალაქი მოვა იქ. ჩვენ ველოდებით ყველას იქ, რომ მივმართოთ სრულიად საქართველოს და გავიზიაროთ ყველა ის წუხილი, რაც მოდის თითოეული ჩვენგანის გულიდან", - ვარლამ გოლეთიანმა.