ისრაელის ქალაქ ლოდში საგანგებო მდგომარეობის რეჟიმი მოქმედებს

საქართველო, თბილისი - 12:36 | 12.05.2021
ნანახია: 664

ისრაელის ქალაქ ლოდში არაბ და ებრაელ მოსახლეობას შორის შეტაკებების გამო საგანგებო მდგომარეობის რეჟიმი ამოქმედდა. შესაბამისი ინფორმაცია ისრაელის პრემიერ მინისტრ ბინიამინ ნეთანიაჰუს Twitter-ზე გამოქვეყნდა.

ამის გარდა, ხელისუფლებამ მიიღო გადაწყვეტილება ლოდში სასაზღვრო პოლიციის ბატალიონების დაუყოვნებლივ გადასროლის შესახებ.

მანამდე ლოდის მერმა პრემიერ ნეთანიაჰუს სთხოვა ქალაქში სამხედრო ქვედანაყოფების შეყვანა, რადგან სიტუაცა ხელისუფლების კონტროლს აღარ ექვემდებარეობდა. ტელეარხ Al-Mayadeen-ის ინფორმაციით, არაბი ახალგაზრდების ჯგუფები წვავდნენ ისრაელელების ავტომობილებს, ასევე იყო ერთ-ერთი სინაგოგის დაწვის მცდელობაც.

არაბულ რაიონებში მღელვარება ისრაელისა და  ღაზის სექტორის ტერიტორიებზე სარაკეტო იერიშის ფონზე იზრდება. ესკალაციის დაწყებიდან ჰამასმა და ისლამურმა ჯიჰადმა ისრაელის მიმართულებით 1000-მდე რაკეტა ისროლეს. ისრაელის თავდაცვის ძალები ღაზის იერიშებს ავიადარტყებით პასუხობენ. ბოლო მონაცემებით ღაზაში ისრაელის სარაკეტო იერიშებს 35 ადამიანი ემსხვერპლა, ისრაელში კი დაღუპულია 5 მოქალაქე.

დაძაბულობა იერუსალიმში, ალ-აკსას მეჩეთთან პალესტინელებისა და ისრაელის პოლიციის დაპირისპირებას მოჰყვა. გასულ დღეებში გავრცელდა ინფორმაცია იერუსალიმის შაიხ ჯარას რაიონიდან პალესტინელთა შესაძლო გასახლების შესახებ, რასაც ამ უკანასკნელთა პროტესტი მოჰყვა.

 

 




არქივი

მოგვძებნე Facebook-ზე