ეს არის დაგეგმილად შექმნილი ამბავი - მეუფე ნიკოლოზი დავით გარეჯში მომხდარ თავდასხმაზე

კუმურდოსა და კარის მიტროპოლიტი, მეუფე ნიკოლოზი ამბობს, რომ დავით გარეჯში ივერი მელაშვილსა და მთავარი არხის გადამღებ ჯგუფზე თავდასხმა "არის დაგეგმილად შექმნილი ამბავი".

"ეს გუშინდელი საქციელი მორიგი საქციელია ახალი ამბის შექმნის. მე ვამბობ, რომ ტელევიზიამ ახალი ამბავი უნდა აღწეროს, არ უნდა შექმნას. გუშინდელი ამბავი ეს არის დაგეგმილად შექმნილი ამბავი, პირდაპირ მეხის გავარდნა მოწმენდილ ცაზე. არაფერი საკონფლიქტო აქ არ იყო და წინასწარ, სავარაუდოდ, აუცილებლად გამოიწვევდა კონფლიქტს ასეთი მოქმედება, რომ მაინდამაინც მონასტრის დღესასწაულზე, აღდგომის დღეებში, ყოველგვარი შეთანხმების გარეშე ჩადიან და აკეთებენ ისეთ სიუჟეტს, რომელიც აუცილებლად გამოიწვევს რეაგირებას", - თქვა მეუფემ.

ამასთან ამბობს, რომ ძალადობას ემიჯნება და სასულიერო პირებმა ეთიკური ნორმები უფრო მეტად უნდა დაიცვან.

"გინება, ხელით შეხება, ყვირილი, მე მიმაჩნია, რომ ეს არის გამოხატულების ფორმები. მით უმეტეს, მე როგორც სასულიერო პირი, რა თქმა უნდა სასულიერო პირებს უფრო მეტად მოვთხოვდი ყოველგვარი ეთიკური ნორმების დაცვას. სასულიერო პირისგან ბევრად უფრო მძიმედ აღიქმება ნებისმიერი დარღვევა", - განაცხადა მეუფე ნიკოლოზმა.

გუშინ, 4 მაისს, დავით გარეჯში ივერი მელაშვილსა და მთავარი არხის გადამღებ ჯგუფს თავს დაესხნენ.