გია გაჩეჩილაძე საზოგადოებრივ მოძრაობა "აი ია"-ს დაფუძნებას გეგმავს

გია გაჩეჩილაძე, იგივე "უცნობი", საზოგადოებრივ მოძრაობა "აი ია"-ს აფუძნებს. ამის შესახებ მან ევროპის მოედანზე გამართული "ინტელექტუალური შეკრების" შემდგომ პრესკოფერენციაზე განაცხადა.

მისი თქმით, აღნიშნული შეკრებით დადასტურდა, რომ ხალხი შექმნილი პოლიტიკური კრიზისით დაიღალა და სიტუაციას განმუხტვა სჭირდება.

გაჩეჩილაძე სამომავლოდ არ გამორიცხავს, რომ საზოგადოებრივი მოძრაობა პოლიტიკურ მოძრაობად გარდაიქმნას.

"ეს მოძრაობა დაფუძნდება ძალიან მალე და შემდეგ უკვე ამ ხალხის კარნახით შევქმნით ახალ ძალას. ეს არის ჩემი ნაფიქრი და გამოჩნდება რამდენად შევძლებთ ამას", - თქვა გაჩეჩილაძემ.

გია გაჩეჩილაძის განცხადებით, შექმნილი პოლიტიკური დაძაბულობის დასრულებაზე პასუხისმგებლობა საზოგადოებამ უნდა აიღოს.

"რაც შეიძლება სწრაფად დავამთავროთ „ნაცმოძრაობის“ პროვოცირებული და „ქართული ოცნების“ უსუსურობით შექმნილი პოლიტიკური მოცემულობა", - დასძინა მან.

შეგახსენებთ, გია გაჩეჩილაძის ორგანიზებით, ევროპის მოედანზე დღეს "ინტელექტუალური შეკრება" გაიმართა. მოედანზე შეკრებილმა რამდენიმე ათასმა ადამიანმა საპატრიარქოსთან გადაინაცვლა და პატრიარქს მხარდაჭერა გამოუცხადა. მოგვიანებით, საზოგადოება გაემართა "დედა ენის" ბაღისკენ, სადაც გაჩეჩილაძის მიერ ინიცირებული "მარადისობის დღის" დაფუძნების შესახებ გამოაცხადეს.