იმედი გვაქვს, მარტის პირველ ორ კვირაში მივიღებთ იმ დოზებს, რასაც ველოდებით "ფაიზერისგან" - გაბუნია

იმედი გვაქვს, მარტის პირველ ორ კვირაში მივიღებთ იმ დოზებს, რასაც ველოდებით "ფაიზერისგან". განაცხადა ჯანდაცვის მინისტრის მოადგილემ თამარ გაბუნიამ, უწყებათაშორისი საკოორდინაციო საბჭოს სხდომის დასრულების შემდეგ, მთავრობის ადმინისტრაციაში გამართულ ბრიფინგზე.

თამარ გაბუნიას განცხადებით, უახლოეს დღეებში შედგება კიდევ ერთი კონსულტაცია "კოვაქსის", "ფაიზერის" და საქართველოს მხარის მონაწილეობით, რის შემდეგაც ცნობილი გახდება ზუსტი დრო, როდის მიიღებს ქვეყანა ვაქცინას.

"ამ კვირაში ჩვენ მივიღეთ დამატებითი პირობები "ფაიზერის" ვაქცინის მოწოდებასთან დაკავშირებით. კვირის ბოლომდე შედგება კიდევ ერთი კონსულტაცია "კოვაქსის", "ფაიზერის" და საქართველოს მხარის მონაწილეობით, რა დროსაც ყველა დეტალი დაზუსტდება და უკვე გვეცოდინება, ზუსტად როდის მივიღებთ შეპირებულ 29 250 დოზას, რაც "კოვაქსის" პლატფორმის საშუალებით საქართველომ პირველ კვარტალში უნდა მიიღოს.

ამ დოზებს თებერვლის ბოლომდე ველოდებოდით, თუმცა "ფაიზერის" მიერ დაყენებული დამატებითი მოთხოვნების გამო, ყველა იმ ქვეყანაში, რომელსაც ეს დოზები უნდა მიეღო, გარკვეული გადავადება მოხდა. ამდენად, მიმდინარე პერიოდში, ჩვენ დავასრულებთ მოლაპარაკებას და იმედი გვაქვს, მარტის პირველ ორ კვირაში მივიღებთ იმ დოზებს, რასაც ველოდებით "ფაიზერისგან".

რაც შეხება "ასტრაზენეკას", ასევე "ასტრაზენეკასთან" მიმდინარეობს აქტიური კომუნიკაცია როგორც "კოვაქსის" პლატფორმის საშუალებით, ასევე უშუალოდ "ასტრაზენეკასთან". მოგეხსენებათ, ჯანმრთელობის მსოფლიო ორგანიზაციამ ბოლო ორი კვირის განმავლობაში ავტორიზაცია მისცა "ასტრაზენეკას" ორ ვაქცინას, ესენია: ინდური წარმოების და კორეული წარმოების ვაქცინები. ჩვენი ქვეყნისთვის მოსალოდნელია "კოვაქსის" პლატფორმით ქვქონდეს წვდომა ამ ორივე ვაქცინაზე.

მიმდინარე დღეებში დაზუსტდება დეტალები, "კოვაქსის" პლატფორმის საშუალებით რა რაოდენობას მივიღებთ "ასტრაზენეკას" ვაქცინას. სავარაუდო, წინასწარი რაოდენობა არის 315 000 დოზამდე, მაგრამ ეს დაზუსტდება და უფრო დეტალურ ინფორმაციას მოგახსენებთ", - განაცხადა თამარ გაბუნიამ.