რუსეთიდან ევროპელი დიპლომატების გაძევების გადაწყვეტილება უპასუხოდ არ დარჩება - ჰაიკო მაასი

გერმანიისა და პოლონეთის საგარეო საქმეთა უწყებები, ასევე საგარეო პოლიტიკისა და უსაფრთხოების საკითხებში ევროკავშირის უმაღლესი წარმომადგენელი ჟოზეფ ბორელის რუსეთიდან ევროპელი დიპლომატების გაძევების ფაქტს ეხმიანებიან.

გერმანიის საგარეო საქმეთა მინისტრ ჰაიკო მაასის თქმით, თუ რუსეთი გადაწყვეტილებას არ გადახედავს, ის უასუხოდ არ დარჩება.

„თუ რუსეთის ფედერაცია არ გადახედავს ამ გადაწყვეტილებას, ის უაპასუხოდ არ დარჩება“, - განაცხადა მაასმა. ის ამბობს, რომ გერმანელი დიპლომატი, რომელიც ალექსეი ნავალნის მხარდამჭერ აქციაზე დაკავეს, ასრულებდა ამოცანას ვენის კონვენციით  გათვალისწინებულ ფარგლებში. მაასი აღნიშნავს, რომ მოსკოვის ქმედება დააზიანებს ევროპასთან მის ურთიერთობებს.

გერმანიის კანცლერმა ანგელა მერკელმა თავის მხრივ, რუსეთის გადაწყვეტილებას უსაფუძვლო უწოდა.

ჯოზეფ ბორელიმ მკაცრდა დაგმო დიპლომატების გაძევების ფაქტი და მათ მიმართ ბრალდებები უარყო.

რუსეთის საგარეო საქმეთა სამინისტრომ ალექსეი ნავალნის მხარდამჭერ აქციებში მონაწილეობისათვის გერმანელი, პოლონელი და შვედი დიპლომატები პერსონა ნონ გრატად გამოაცხადა.

საგარეო საქმეთა სამინისტრომ დიპლომატებს უბრძანა, ქვეყანა უახლოეს დღეებში დატოვონ.

 ალექსეი ნავალნის მხარდამჭერი აქციები რუსეთის ქალაქებში 23 და 31 იანვარს გაიმართა.