კოსოვო ევროსაბჭოში გაწევრიანების შესახებ განაცხადის შეტანას გეგმავს

საქართველო, თბილისი - 16:50 | 15.12.2017

ნანახია: 1098

კოსოვო დეკემბერში ან მომავალი წლის იანვარში ევროსაბჭოში გაწევრიანების შესახებ განაცხადს შეიტანს. ამის შესახებ კოსოვოს ვიცე-პრემიერმა ენვერ ხოჯაიმ განაცხადა.

მისი შეფასებით, თუ განაცხადს ახლა შეიტანენ, ევროსაბჭოს წევრობა უახლოეს ორი წლის განმავლობაში გაფორმდება, რადგან ევროპის საბჭოს ამ ხნის განმავლობაში ის ქვეყნები უხელმძღვანელებენ, რომლებამც კოსოვოს დამოუკიდებლობა აღიარეს.

„ევროპის საბჭო ევროკავშირის შემდეგ ევროპაში ერთ-ერთი მნიშვნელოვანი ორგანიზაციაა, ჩვენ კი რეგიონში ერთადერთი ქვეყანა ვართ, რომელიც მის ნაწილს არ წარმოადგენს“, - აღნიშნა ხოჯაიმ.

კოსოვოს დამოუკიდებლობა აშშ-მა და ევროკავშირის წამყვანმა ქვეყნებმა 2008 წელს აღიარეს. მას შემდეგ კოსოვოს უამრავი მცდელობა ჰქონდა საერთაშორისო ორგანიზაციებში მოსახვედრად, რათა თავისი დამოუკიდებლობა გაემყარებინა.

კოსოვოს დამოუკიდებლობა ამ მომენტისთვის გაეროს 100-ზე მეტ წევრ ქვეყანას აქვს აღიარებული.