ბრიტანეთს ახალი თავდაცვის მინისტრი ჰყავს

დიდი ბრიტანეთის თავდაცვის მინისტრად კონსერვატიული პარტიის წარმომადგენელი გევინ უილიამსონი დაინიშნა.

 სამინისტროს ხელმძღვანელი მაიკლ ფელონი დიდი ხნის წინ მომხდარი სექსუალური სკანდალის ფონზე გადადგა.

ცოტა ხნის წინ რადიოწამყვანმა და წარსულში გაზეთ Sunday Express-ის პოლიტიკურმა მიმომხილველმა ჯულია ჰართლი-ბრიუერმა ინციდენტის შესახებ ისაუბრა, რომელიც 15 წლის წინ მოხდა.

კონსერვატიული პარტიის კონფერენციაზე მამაკაცმა, რომლის ვინაობაც ჟურნალისტს არ დაუსახელებია, მის მუხლზე ხელის შეხება რამდენჯერმე სცადა, რის შემდეგაც ჟურნალისტი მას სილის გაწვნით დაემუქრა.

 მამაკაცის ვინაობა სწრაფად დაადგინა ტაბლოიდმა Sun-მა. ის სერ ფელონი აღმოჩნდა. ფელონმა შემდეგ აღიარა, რომ ერთხელ თავს ჰართლი-ბრიუერის მიმართ შეუფერებელი ქმედების უფლება მისცა. მისი თქმით, თავისი საქციელის გამო ბოდიში დიდი ხნის წინ მოიხადა.