„მარიამ“ ვირჯინიის კუნძულებამდე მიაღწია და პუერტო-რიკოსკენ მიემართება

ქარიშხალმა „მარიამ“ ვირჯინიის კუნძულებამდე მიაღწია და პუერტო-რიკოსკენ მიემართება.

შტორმმა, რომელსაც მეხუთე- მაქსიმალური კატეგორია მიენიჭა, ამ მომენტისთვის სანტა-კრუსის კუნძულამდე მიაღწია.

მანამდე ქარიშხალმა დომენიკის კუნძულს გადაუარა და კოლოსალური ნგრევა მოუტანა. „ჩვენ დავკარგეთ ყველაფერი, რისი ყიდვაც მხოლოდ ფულით შეიძლება“, -განაცხადა კუნძულის პრემიერ-მინისტრმა რუზველტ სკერიტმა.

გარკვეულ მომენტში ქარიშხლის სიმძლავრემ მეოთხე კატეგორიამდე დაიწია, მაგრამ ახლა შტორმმა კვლავ მეხუთე კატეგორიამდე გაიზარდა.

ქარის სიმძლავრე საათში 280 კმ-ს შეადგენს. ის თითქმის იგივე ტრაექტორიით მოძრაობს, როგორც შტორმი „ირმა“ მოძრაობდა.

აშშ-ის მიერ კონტროლირებადი პუერტო-რიკოს გუბერნატორმა კუნძულის 3,5 მილიონიან მოსახლეობას თავშესაფრის მოძებნისკენ მოუწოდა.