პოლიციამ საუდის არაბეთის პრინცი მეფის ბრძანებით დააკავა

ერ-რიადის პოლიციამ საუდის არაბეთის სამეფო დინასტიის წარმომადგენელი მეფის სალმანის ბრძანებით ვიდეორგოლისთვის დააკავა. ამის შესახებ ტელეარხი Al-Ekhbariya იუწყება. ვიდეოჩანაწერში პრინცი ადამიანებს თავს ესხმის.
სოციალურ ქსელში გავრცელდა ვიდეორგოლი და ფოტოსურათები, სადაც სავარაუდოდ პრინცი თავს ესხმის ადამიანებს, მათ შორის ქალებსაც.

მედიის ცნობით, მეფე სალმან ბენ აბდელ აზიზ ალ საუდის ბრძანებით, პრინცი საუდ ბენ აბდულ-აზიზი ბენ მუსაიდი ციხეში სხვა პირებთან ერთად მოათავსეს, რომლებიც სამარცხვინო ვიდეორგოლში ჩანდნენ. მედიის ცნობით, მათ უფლებამოსილებას გადაამეტეს და კანონები დაარღვიეს.

ერ-რიადის პოლიციამ პრინცი ვიდეოჩანაწერის გავრცელებისთანავე დააკავა. პრესის ინფორმაციით, 27 წლის პრინცი პირველად ფიგურირებს ოფიციალური მედიის ახალ ამბებში.

ბრძანების თანახმად, უფლებამოსილმა ორგანოებმა უნდა ჩაატარონ გამოძიება და მოუსმინონ მოწმეებს.