ესტონეთის საგარეო საქმეთა მინისტრი მიხეილ ჯანელიძეს შეხვდა

საქართველო, თბილისი - 14:21 | 24.04.2017

ნანახია: 1096

ესტონეთის საგარეო საქმეთა მინისტრი სვენ მიკსერი თბილისში ვიზიტით იმყოფება.

სვენ მიკსერი საქართველოს საგარეო საქმეთა მინისტრს მიხეილ ჯანელიძეს შეხვდა. შეხვედრაზე ყურადღება გამახვილდა ორ ქვეყანას შორის არსებულ 25-წლიან დიპლომატიურ ურთიერთობაზე.

სვენ მიკსერმა კიდევ ერთხელ აღნიშნა, რომ ესტონეთი მხარს უჭერს საქართველოს სუვერენიტეტსა და ტერიტორიულ მთლიანობას.

სვენ მიკსერის თქმით, საქართველო ასრულებს ნაკისრ ვალდებულებებს როგორც, ევროკავშირთან, ასევე ნატო-სთან.

"საქართველოს მთავრობას მოუწევს მტკივნეული რეფორმების ჩატარება, რათა გახდეს ევროკავშირის სრულფასოვანი წევრი. თუმცა ეს პროცესი დადებითად აისახება მოსახლეობასა და ქვეყნის ეკონომიკაზე", - განაცხადა ესტონელმა დიპლომატმა.

როგორც საქართველოს საგარეო საქმეთა მინისტრმა მიხეილ ჯანელიძემ განაცხადა, ესტონეთი პირველი ივლისიდან ევროკავშირის საბჭოს თავმჯდომარე ქვეყანა ხდება, რაც ვიზიტის მნიშვნელობას ხაზს კიდევ ერთხელ უსვამს.

მისივე თქმით, ესტონეთი მიესალმება საქართველოს ევროპულ მისწრაფებებს.მიხეილ ჯანელიძის თქმით, ორ ქვეყანას შორის პირდაპირი საჰაერო მიმოსვლის დაწყებაზე აქტიური მუშაობა მიმდინარეობს.

ესტონეთის საგარეო უწყების ხელმძღვანელი ასევე შეხვდება საქართველოს პრეზიდენტს, პრემიერ-მინისტრს, პარლამენტის თავმჯდომარეს. სვენ მიკსერი საოკუპაციო ხაზსაც მოინახულებს და გვირგვინით შეამკობს გმირთა მემორიალს.