უმძიმესი დანაშაული ავიცილეთ, ეს იქნებოდა საქართველოზე დარტყმა - კალაძე დეკანოზ გიორგი მამალაძის დაკავების ფაქტს ეხმიანება

ენერგეტიკის მინისტრი კახა კალაძე დეკანოზ გიორგი მამალაძის დაკავების ფაქტს ეხმიანება და აცხადებს, რომ ეს იქნებოდა უმძიმესი დარტყმა დარტყმა საქართველოზე.

"უმძიმესი დანაშაული ავიცილეთ. ეს იყო კარგად გათვლილი გეგმა. ეს არ იქნებოდა დარტყმა მხოლოდ ეკლესიაზე, მხოლოდ მართლმადიდებლებზე, ეს იქნებოდა დარტყმა საქართველოზე, ქვეყნის ინსტიტუტებზე, ქვეყანაში მშვიდობაზე. ყველა უმკაცრესად დაისჯება", - ამბობს ენერგეტიკის მინისტრი.

კალაძე უსაფრთხოების სამსახურს და პროკურატურას მადლობას უხდის.

დეკანოზი გიორგი მამალაძე მკვლელობის მომზადების ფაქტზე დააკავეს. ერთ-ერთმა მოქალაქემ მიმართა პროკურატურას და მიუთითა, რომ მისმა ნაცნობმა, მამა გიორგი მამალაძემ სთხოვა სიცოცხლისთვის საშიში შხამიანი ნივთიერების - ციანიდის მოძიებაში დახმარება, რომლის გამოყენებითაც უნდა მოეხდინა მაღალი იერარქიის სასულიერო პირის სიცოცხლის ხელყოფა.

მთავარმა პროკურორმა არც დაადასტურა და არც უარყო, რომ დეკანოზი პატრიარქის მკვლელობას ამზადებდა. "ამ ეტაპზე რაც დგინდება, ანგარებითი მოტივია", - დასძინა შოთაძემ.

დაკავებული დანაშაულს არ აღიარებს და დუმილის უფლებას იყენებს.