ბათუმის სასპორტო სკოლაში საჯარო შეხვედრა გაიმართა

სასპორტო სკოლაში სპორტის სფეროში მოღვაწეებთან და სხვა დაინტერესებულ მხარეებთან საჯარო შეხვედრა გაიმართა. შეხვედრაზე საზოგადოებას სიტყვით აჭარის ფინანსთა და ეკონომიკის მინისტრმა რამაზ ბოლქვაძემ და აჭარის განათლების, კულტურისა და სპორტის მინისტრმა ინგა შამილიშვილმა მიმართეს. რამაზ ბოლქვაძემ შეხვედრის მონაწილეებთან სასპორტო სკოლასთან ე.წ „ბასკოსთან“ დაკავშირებითაც ისაუბრა და აღნიშნა, რომ შენობა არ არის პრივატიზებული და ის არ დაინგრევა:
„პირველ რიგში მინდა მადლობა გადაგიხადოთ აქ შეკრებისთვის, თემისადმი თქვენი ასეთი მაღალი ინტერესისთვის და აქვე კიდევ ერთხელ მინდა აღვნიშნო, რომ ჩვენთვის ძალიან მნიშვნელოვანია თქვენი მოსაზრება, წინადადებები და დღევანდელი შეხვედრის მიზანიც სწორედ ის არის, რომ სპორტის სფეროში ნებისმიერ საკითხზე გადაწყვეტილება თქვენთან კომუნიკაციით, თქვენი ინტერესების გათვალისწინებით მივიღოთ.
მინდა ხაზგასმით აღვნიშნო, რომ სასპორტო სკოლა ე.წ ბასკოს შენობა არ არის პრივატიზებული და ის არ ინგრევა. ინვესტორმა 200 მლნ ლარის ინვესტიციის განხორციელების მიზნით შეიძინა მხოლოდ სასპორტო სკოლის უკან არსებული ორი სპორტული ცენტრის მიწის ნაკვეთი, თუმცა მოქმედი სპორტული სახეობების უწყვეტად ფუნქციონირების მიზნით, კომპანია 18 თვის განმავლობაში ალტერნატიულ შენობა-ნაგებობაში სპორტული სახეობების განთავსების ხარჯებს დაფარავს. პარალელურად უკვე დაწყებულია ლეონიძის ქუჩაზე ახალი სპორტული ცენტრის მშენებლობის პროცედურები, რომელსაც აჭარის მთავრობა უზრუნველყოფს. ამ ეტაპზე პროექტირების ეტაპია და უახლოეს პერიოდში სამშენებლო სამუშაოები დაიწყება. სპორტსმენები სწორედ აღნიშნული შენობაში გააგრძელებენ სამომავლოდ საქმიანობას. ვიდრე არ მოხდება სპორტსმენების ალტერნატიულ ფართში განთავსება არსებული ორი სპორტული ცენტრის დემონტაჟი არ განხორციელდება.
სასპორტო სკოლის უკან არსებულ ორ სპორტულ ცენტრში მოღვაწე სპორტსმენებს ექნებათ ახალი შენობა და კიდევ უფრო უკეთესი პირობები სპორტული საქმიანობისთვის. მინდა ასევე აღვნიშნო, რომ ბათუმში კიდევ ერთი მულტიფუნქციური სპორტული კომპლექსის მშენებლობა უკვე დაწყებულია ყინულის სასახლესთან, რაც აჭარაში სპორტის განვითარებას შეუწყობს ხელს“.
სასპორტო სკოლაში შეხვედრა კითხვა-პასუხის რეჟიმში გაიმართა. შეხვედრის მონაწილეებმა კითხვები მინისტრებს დაუსვეს. დამსწრეებს აჭარის განთლების,კულტურისა და სპორტის მინისტრმა ინგა შამილიშვილმა მიმართა. მინისტრმა თავის გამოსვლაში აღნიშნა, რომ სპორტი მთავრობის პრიორიტეტული მიმართულებაა და სპორტსმენებს აუცილებლათ ექნებათ უკეთესი პირობები ვარჯიშისთვის და საქმიანობიოსთვის. ინგა შამილიშვილმა ასევე წარმატებულ სპორტსმენებზე ისაუბრა და მათ კიდევ ერთხელ მადლობა გადაუხადა.