საქართველოს საპატრიარქოს დელეგაცია ჯეიმს აპატურაის შეხვდა

საქართველოს საპატრიარქოს ოფიციალური დელეგაცია ნატო-ს გენერალური მდივნის სპეციალურ წარმომადგენელს სამხრეთ კავკასიასა და ცენტრალურ აზიაში ჯეიმს აპატურაის შეხვდა. როგორც შეხვედრის დასრულების შემდეგ ახალციხისა და ტაო-კლარჯეთის მიტროპოლიტმა, საქართველოს კათოლიკოს-პატრიარქის ქორეპისკოპოსმა მეუფე თეოდორემ განაცხადა, პატრიარქი ძალიან დიდ მნიშვნელობას ანიჭებს ამ ვიზიტს. 
”პატრიარქი ძალიან დიდ მნიშვნელობას ანიჭებს ამ ვიზიტს და ძალიან მაღალი რანგის სასულიერო პირები არიან წარმოდგენილნი ამ დელეგაციაში. ჩვენთვის, ძალიან სასიხარულოა ასეთი თბილი შეხვედრა, რომელიც მოგვიწყვეს. საკმაოდ ფართო და დიდი ინფორმაცია მოგვაწოდეს საქართველოსა და ნატო-ს ურთიერთობასთან დაკავშირებით. ხვალ ალბათ კიდევ დამატებით მივიღებთ ინფორმაციას ევროპული სტრუქტურებიდან”, - განაცხადა მეუფემ. 
გორისა და ატენის მიტროპოლიტმა მეუფე ანდრიამ კი აღნიშნა, რომ დღევანდელ შეხვედრაზე საუბარი შეეხო იმ რთულ ვითარებას, რომელიც აფხაზეთსა და სამაჩაბლოს მიმართულებით დღეს არსებობს. 
”ვისაუბრეთ დევნილთა რაოდენობაზე და გზებზე როგორ შეიძლება ამ ყოველივეს დაძლევა. საქართველოს ეკლესია მხარს უჭერს საქართველოს სახელმწიფოს, მის განვითარებას და ჩვენ გვსურს კეთილმეზობლური ურთიერთობა ჩვენს ირგვლივ მყოფ ყველა ქვეყანასთან”, - განაცხადა მეუფემ. 
ჯეიმს აპატურაის თქმით კი, სასულიერი პირები საკმაოდ ინფორმირებულნი არიან.
”ჩემთვის დიდი პატივია არქიეპისკოპოსებთან და სინოდის წევრებთან შეხვედრა. ასეთი დელეგაცია ჩვენთან პირველად ჩამოვიდა. როდესაც გენერალური მდივნის მოადგილე იმყოფებოდა საქართველოში, ის შეხვდა საქართველოს პატრიარქს. მინდა აღვნიშნო, რომ სასულიერი პირები საკმაოდ ინფორმირებულნი არიან. დეტალურად ვისაუბრეთ შავი ზღვის რეგიონის უსაფრთხოებაზე, ნატო- საქართველოს ურთიერთობაზე, ქვეყნის შიდა პოლიტიკურ ვითარებაზე, იმ გამოწვევებზე, რომლის წინაშეც დგანან დევნილები. დღეს დელეგაციის წევრებმა აღნიშნეს, რომ მათი პოზიცია არის ქართველი ხალხის ნების მხარდაჭერა. ჩვენ ვიცით, თუ რა მნიშვნელოვან როლს თამაშობს ეკლესია ქართულ საზოგადოებაში”, - აღნიშნა აპატურაიმ.