ზაალ უდუმაშვილი: განჩინება, რომელიც წაიკითხა ურთმელიძემ სხვა შენობაშია დაწერილი, სხვა ადამიანის მიერ

სამაუწყებლო კომპანია რუსთავი 2-ის გენერალური დირექტორის მიერ სასამართლო დარბაზის დატოვების შემდეგ, სასამართლო შენობის ეზოში შეფასებები გაკეთდა.

როგორც ცნობილია, ცოტა ხნის წინ მოსამართლე თამაზ ურთმელიძემ ნიკა გვარამია დარბაზიდან გააძევა.

მოსამართლის გადაწყვეტილების შემდეგ პროტესტის ნიშნად სხდომა დატოვეს რუსთავი 2-ის იმ ჟურნალისტებმა, რომლებიც სასამართლო სხდომას ესწრებოდნენ. არხის გენერალური დირექტორის მოადგილე აცხადებს, რომ მოსამართლის მიერ დღეს წაკითხული განჩიება მისი დაწერილი არ არის. 

"მას შემდეგ, რაც ურთმელიძემ განაცხადა, რომ დედა მისი ოჯახის წევრი არ არის, სხვა გადაწყვეტილებას არც ველოდი და უკვე ვიცოდი, რომ არც ერთი ჩვენი გადაწყვეტილება არ დაკმაყოფილდებოდა. ეს განჩინება, რომელიც წაიკითხა ურთმელიძემ და რომელსაც ალბათ წაიკითხავს საბოლოო გადაწყვეტილების სახით, სულ სხვა შენობაშია დაწერილი, სულ სხვა ადამიანის მიერ. შესაბამისად, რასაც ჩვენ ვამბობთ, რომ ეს არის პირდაპირი ომი გამოცხადებული თავისუფალი მედიის მიმართ, დღეს კიდევ ერთხელ დაადასტურა ოფიციალურად ურთმელიძემ თავისი დღევანდელი გადაწყვეტილებებით, ყოველგვარი არგუმენტების გარეშე.

"რა გადაწყვეტილებაც არ უნდა მიიღოს მოსამართლემ, ეს არ ნიშნავს არაფრის დასასრულს. ეს არის ბრძოლის დასაწყისი, ახალი ეტაპის დასაწყისი, რომელსაც ჩვენ აუცილებლად ბოლომდე მივიყვანთ რუსთავი 2-ის გამარჯვებით," - განაცხადა ზაალ უდუმაშვილმა. 

რუსთავი 2-ის გენერალური დირექტორის მოადგილე არ გამორიცხავს, რომ მოსამართლე ურთმელიძემ დღესვე გამოაცხადოს გადაწყვეტილება ქიბარ ხალვაშის სასარგებლოდ.