ხაშურის გამგებელი #6 საბავშვო ბაღის სარეაბილიტაციო სამუშაობს გაეცნო

ხაშურის მუნიციპალიტეტის გამგებელმა გიორგი გურასპაშვილმა გამგეობის წარმომადგენლებთან ერთად, თევდორე მღვდლის ქუჩაზე #6 საბავშვო ბაღის სარეაბილიტაციო სამუშაოები დაათვალიერა.

როგორც გამგეობაში აცხადებენ, #6 საბავშვო ბაღის შენობა გასული საუკუნის 70-იან წლებში აშენდა და ავარიული მდგომარეობის გამო აღარ ფუნქციონირებდა.

„წლების განმავლობაში ეს ბაღი თავის ფუნქციას ვეღარ ასრულებდა. ის იმდენად იყო ამორტიზებული, რომ საფრთხეს უქმნიდა ბავშვების სიცოცხლეს და ჯანმრთელობას, ამიტომ სააღმზრდელო პროცესი დაქირავებულ შენობაში მიმდინარეობდა.

სამუშაოები საკმაოდ მოცულობითია და პროექტი თანადაფინანსების პრინციპით ხორციელდება. წლის ბოლოსთვის ჩვენს ქალაქს კიდევ ერთი საბავშვო ბაღი შეემატება, რომელიც იქნება თანამედროვე სტანდარტებით აშენებული. სკოლამდელი დაწესებულება აღიჭურვება ბავშვთა აღზრდა-განათლებისთვის ყველა საჭიროინვენტარით და მათთვის ყველა პირობა იქნება შექმნილი, რათა მომზადებული შეხვდნენ სასკოლო პროცესს", - განაცხადა ხაშურის გამგებელმა გიორგი გურასპაშვილმა.

საბავშვო ბაღის სარეაბილიტაციო სამუშაოები ხაშურის მუნიციპალიტეტის გამგეობის თანადაფინანსებით და რეგიონებში განსახორციელებელი პროექტების ფონდიდან გამოყოფილი სახსრებით მიმდინარეობს. პროექტის ღირებულება 759 857 ლარს შეადგენს და სამუშაოები 2016 წლის ბოლოსთვის დასრულდება.