ვაშინგტონში უკრაინის მხარდამჭერი ახალი დოკუმენტი გაფორმდა

უკრაინის მხარდასაჭერად მსოფლიოს 23 ქვეყნის ლიდერებმა, ევროკავშირის ხელმძღვანელებმა და უკრაინის პრეზიდენტმა გააფორმეს ახალი შეთანხმება Ukraine Compact. დოკუმენტს ხელი მოეწერა ვაშინგტონში, ნატოს სამიტზე, რომელმაც მუშაობა 11 ივლისს დაასრულა.

შეთანხმების მიღებისას სიტყვით გამოვიდნენ აშშ-ის პრეზიდენტი ჯო ბაიდენი და უკრაინის ლიდერი ვოლოდიმირ ზელენსკი.

„მოკლევადიან პერსპექტივაში ჩვენ გავაგრძელებთ უკრაინისთვის იარაღის, საბრძოლო მასალის მიწოდებას და წვრთნების ჩატარებას, რომელიც აუცილებელია რუსული ჯარების მოსაგერიებლად. საშუალოვადიან პერიოდში, ჩვენ დავეხმარებით ძალების და შესაძლებლობების შექმნას უკრაინის დასაცავად და შემდგომი აგრესიის შესაჩერებლად, - აღნიშნა ბაიდენმა.

მისი თქმით, შეთანხმება მიღებულ იქნა იმის დასადასტურებლად, რომ თუ ომის დასრულების შემდეგ რუსეთი კვლავ თავს დაესხმება უკრაინას, ხელმომწერები მხარს დაუჭერენ უკრაინას. ზელენსკიმ დასძინა, რომ უკრაინის უსაფრთხოების გარანტიებზე აქტიური მუშაობა მიმდინარე წელს გრძელდება, მაგრამ ეს შეთანხმებები არ ცვლის ნატო-ს წევრობას.

"მადლობას ვუხდი პრეზიდენტ ბაიდენს მისი ლიდერობისთვის და ძალისხმევისთვის, რათა უზრუნველყოს ჩვენი თანამშრომლობა უსაფრთხოებისთვის გადამწყვეტი ქმედებებით. არსებობს 23 ძლიერი შეთანხმება და იქნება შეთანხმებები სხვა ქვეყნებთან. ჩვენ გვაქვს ისტორიულად მნიშვნელოვანი უსაფრთხოების შეთანხმება შეერთებულ შტატებთან", - თქვა მან.

როგორც ზელენსკიმ აღნიშნა, მთელი ეს სამუშაო ხელს უწყობს გრძელვადიანი ვალდებულებების მიღებას ისეთ საკითხებში, როგორიცაა:

სამხედრო დახმარება;

  დამატებითი საჰაერო თავდაცვის სისტემები;

  წინსვლა F-16-ის ტიპის თვითმფრინავების გადაცემის საკითხში;

  თავდაცვის სფეროში თანამშრომლობის განვითარება.

„უკრაინის შეთანხმება ახალ დონეზე აიყვანს ჩვენს ურთიერთობებს. ეს უკრაინისა და ყველა ჩვენგანისთვის მნიშვნელოვანი მიღწევაა“, - აღნიშნა ზელენსკიმ.