ევროპარლამენტმა კორუფციული გამოძიების გამო ვიცეპრეზიდენტ ევა კაილის მანდატი შეუჩერა

ევროპარლამენტმა მსოფლიო ჩემპიონატის მასპინძელ კატართან დაკავშირებული კორუფციული გამოძიების გამო ვიცეპრეზიდენტ ევა კაილისთვის მანდატის შეჩერების გადაწყვეტილება მიიღო.

ევროპის პარლამენტის თავმჯდომარემ, რობერტა მეცოლამ, „გადაწყვიტა, დაუყოვნებლივ შეეჩერებინა ყველა უფლებამოსილება, მოვალეობა და ამოცანა, რაც დაკისრებული ჰქონდა ევა კაილის, როგორც ევროპის პარლამენტის თავმჯდომარის მოადგილეს,“ განაცხადა ევროპარლამენტის პრესსპიკერმა.

კაილი, რომელიც საბერძნეთს წარმოადგენს, მექრთამეობასთან დაკავშირებული გამოძიების ფარგლებში ბელგიაში 9 დეკემბერს დააკავეს რამდენიმე სხვა ეჭვმიტანილთან ერთად.

როგორც მედია იტყობინება, კაილი და სხვა დაკავებულები ეჭვმიტანილი არიან კორუფციაში და კატარის ინტერესების ლობირებაში ფეხბურთის მსოფლიო ჩემპიონატის იქ ჩატარებასთან დაკავშირებით.

ჩხრეკისას პოლიციამ დაახლოებით 600 000 ევრო ნაღდი ფული ამოიღო.
ევა კაილი, რომელიც ასევე საბერძნეთის სოციალისტური პარტიის, PASOK-ის წევრი იყო, პარტიიდან გარიცხეს. PASOK-მა ოფიციალურ განცხადებაში გადაწყვეტილების მთავარ მიზეზად კორუფციის ბრალდება დაასახელა.

ევა კაილი იყო ერთ-ერთი ევროპარლამენტის იმ წარმომადგენელთა შორის, რომლებიც კატარის შრომის ბაზარზე არსებულ მდგომარეობას იკვლევდნენ. კაილი იმყოფებოდა კატარში, რის შემდეგაც იქ განხორციელებული და მიმდინარე რეფორმები დადებითად შეაფასა, მიუხედავად საერთაშორისო ინსტანციების არაერთი განცხადებისა კატარში ოლიმპიური ობიექტების მშენებლობისას მუშების უფლებების დარღვევის შესახებ.