დემოკრატებმა სენატში უმრავლესობა გაიმტკიცეს - ჯორჯიის შტატში რაფაელ უორნოკმა გაიმარჯვა

წინასწარი მონაცემებით, ჯორჯიის შტატში სენატის არჩევნების მეორე ტურის შედეგად, მოქმედი დემოკრატი სენატორი რაფაელ უორნოკი იმარჯვებს. შესაბამის ინფორმაციას „ბიბისი“ Edison Research-ზე დაყრდნობით ავრცელებს.

ამის შედეგად, დემოკრატები ზედა პალატაში აბსოლუტურ უმრავლესობას მოიპოვებენ.

უორნოკმა მეორე ტურში რესპუბლიკელი კანდიდატი ჰერშელ უოლკერი დაამარცხა. ამგვარად, 100-ადგილიან სენატში დემოკრატებს 51, რესპუბლიკელებს კი, 49 ხმა ექნებათ.

ორივე კანდიდატმა მხარდამჭერებს უკვე მიმართა და მადლობა გადაუხდა.

დემოკრატ რაფაელ უორნოკის თქმით, რთული კამპანიის შემდეგ, მისთვის პატივია, წარმოთქვას დემოკრატიის ყველაზე ძლიერი სიტყვები – „ხალხმა თავისი სათქმელი თქვა“.

დამარცხებული რესპუბლიკელმა ჰარშელ უოლკერმა განაცხადა, რომ მისი მრავალი სპორტული მიღწევის მიუხედავად, „სენატში კენჭისყრა იყო საუკეთესო რამ, რაც კი მთელი ცხოვრების განმავლობაში გამიკეთებია“. ამასთან, როგორც უოლკერმა აღნიშნა, არასდროს შეწყვეტს ბრძოლას ჯორჯიისთვის

ნოემბრის შუალედური არჩევნების შედეგად დემოკრატებმა და რესპუბლიკელებმა სენატში 49-49 ადგილი მიიღეს. ამის გამო გადამწყვეტი ხდებოდა კამალა ჰარისის ხმა, რომელიც სხდომებში იღებს მონაწილეობას.

ამავე დროს, წარმომადგენელთა პალატაზე კონტროლი რესპუბლიკურმა პარტიამ მოიპოვა.

ჯორჯიაში პირველი ტურის დროს ვერც რესპუბლიკელმა გერშელ უოკერმა და ვერც დემოკრატმა რაფაელ უორნოკმა ხმების 50%-ზე მეტი ვერ მოიპოვეს, რაც გამარჯვებისთვის იყო აუცილებელი. ამის გამო ჯორჯიაში მეორე ტური დაინიშნა.

უოკერი, რომელიც ამერიკული ფეხბურთის ცნობილი მოთამაშეა, აბორტების წინააღმდეგ გამოდიოდა და მას პირადად დონალდ ტრამპი უჭერდა მხარს.

უორნოკი ებენზერას ბაპტისტური ეკლესიის პასტორია, სადაც თავის დროზე მსახურებას მარტინ ლუთერ კინგი უმცროსი ატარებდა.