ლუჰანსკის რეგიონში უკრაინის არმიასა და რუსეთის საოკუპაციო ძალებს შორის მძიმე ბრძოლები მიმდინარეობს

ლუჰანსკის რეგიონში უკრაინის არმიასა და რუსეთის საოკუპაციო ძალებს შორის მძიმე ბრძოლები მიმდინარეობს. ინფორმაციას უკრაინული მედია გენშტაბზე დაყრდნობით ავრცელებს. გენშტაბის ცნობით, უკრაინის თავდაცვის ძალები მედგრად აკავებენ მტრის უპირატეს ძალებს.

ლუჰანსკის რეგიონის დასახლებულ პუნქტ სიროტინოს რაიონში განადგურებულია რუსეთის საოკუპაციო ძალების კოლონები. მოწინააღმდეგის დანაკარგების შესახებ ცნობები ზუსტდება.

 „ლუჰანსკის რეგიონის დროებით ოკუპირებულ ტერიტორიებზე გრძლედება ადგილობრივი მოსახლეობის იძულებითი გადასახლება. კერძოდ, ქალაქ ლუჰანსკში იძულებით გაყვანილია ბელოვოდსკის მოსახლეობა“, - აღნიშნულია გენშტაბის განცხადებაში.

ყველაზე მძიმე ბრძოლები ამჟამად აღმოსავლეთ ფრონტზე  მიმდინარეობს. უკრაინის შეიარაღებული ძალების მონაცემებით, ლუჰანსკის ოლქის გათავისუფლებისათვის სამხედრო ოპერაცია რთული იქნება, რადგან რუსმა ოკუპანტებმა მოასწრეს რეგიონის ტერიტორიაზე გამაგრება და დახმარება მიიღეს ე.წ. ლუგანსკის სახალხო რესპუბლიკიდან მებრძოლებისა და იმ ძალების სახით, რომლებიც ხარკოვის რეგიონიდან გაიქცნენ. ოკუპანტები იკავებენ უკრაინელების ცარიელ სახლებს.

ბოლო მონაცემებით, ლუჰანსკის რეგიონში უკვე გათავისუფლებულია 12 დასახლებული პუნქტი.

ლუჰანსკის რეგიონის სამხედრო ადმინისტრაციის ხელმძღვანელის სერჰი გაიდაის თქმით, უკრაინის შეიარაღებული ძალები სიფრთხილით მიიწევენ სავატოვოს მიმართულებით. მტერი განიცდის მნიშვნელოვან დანაკარგებს.