ბევრ ევროპულ ქვეყანას წინ ვუსწრებთ ყველა მიმართულებით - ირაკლი ღარიბაშვილი

ბევრ ევროპულ ქვეყანას წინ ვუსწრებთ ყველა მიმართულებით – მართლმსაჯულების, კორუფციის მართვის, თუ ადამიანის უფლებების მიმართულებით, ეკონომიკის თავისუფლების, ყველა მიმართულებით ჩვენ გვაქვს სრული პროგრესი ბოლო რვა წლის განმავლობაში, -  ამის შესახებ საქართველოს პრემიერ-მინისტრმა, ირაკლი ღარიბაშვილმა ჟურნალისტებს განუცხადა.

მისივე თქმით, დღეს მოქალაქე არ იჩაგრება და შეუძლია, იპოვოს სამართალი სასამართლოში.

„დღეს რომ ლაპარაკობენ სასამართლოზე და ბედავენ და აკრიტიკებენ, იყო 3 000-4 000, იყო შემთხვევები 5 000 განცხადებაც კი შესული სტრასბურგში. ეს რას ნიშნავს მეგობრებო, რომ აქ მოქალაქეები სამართალს ვერ პოულობდნენ. ჩვენ ხომ კარგად ვიცით, რომ დღეს მოქალაქე არ იჩაგრება. მოქალაქეს შეუძლია, იპოვოს სამართალი სასამართლოში“, – აღნიშნა პრემიერმა.

ღარიბაშვილის თქმით, დღეს რეალურად გვაქვს ქვეყანაში დემოკრატია, სიტყვის თავისუფლება, ადამიანის უფლებები არ ირღვევა და "ამას დანახვა სჭირდება".

"იძახიან, რომ სასამართლო არ არის დამოუკიდებელი და ა.შ., თქვენ როგორ წარმოგიდგენიათ 300 მოსამართლეს ვინ მართავს. მთავრობა მართავს, მე ვმართავ, თუ პროკურატურა მართავს?! ეს არის აბსურდი. ეს 300 მოსამართლე რომ ავიღოთ, დანიშნული არიან ზოგი შევარდნაძის დროს, უმეტესობა სააკაშვილის დროს. რეკომენდაცია იყო ჩვენი არასამთავრობო ორგანიზაციების, მათ შორის უცხოელი კოლეგების, პარტნიორების, რომ ჩვენ მოგვეხდინა ამ მოსამართლეების სამუდამო დანიშვნა. ჩვენ ეს ყველაფერი გავითვალისწინეთ. მოგეხსენებათ, რომ სასამართლოზე ქართული მედია, თქვენ არათუ არ დაიშვებოდით მიშა სააკაშვილის დროს, არამედ უბრალოდ წარმოუდგენელი იყო რაიმე სამართლის პოვნა. ამიტომ, ეს რეალობა, ეს კონტრასტი, რაც დღეს მივიღეთ, ეს საშინელი პერიოდი, დღეს რეალურად გვაქვს ქვეყანაში დემოკრატია, სიტყვის თავისუფლება, ადამიანის უფლებები არ ირღვევა, გვაქვს სრული გამჭირვალობა, ანგარიშვალდებულება საზოგადოების წინაშე, მედიის წინაშე, ამას მეგობრებო, სჭირდება დანახვა. ავიღოთ ევროკავშირის წევრი ქვეყნების სასამართლო სისტემის და მართლმსაჯულების საშუალო რეიტინგები და გამოკითხვის შედეგები რომ შევადაროთ ჩვენს სისტემას, ჩვენ არათუ იმ პარამეტრებში ვჯდებით, არამედ ბევრ ევროპულ ქვეყანას წინ ვუსწრებთ ყველა მიმართულებით – მართლმსაჯულების, კორუფციის მართვის, თუ ადამიანის უფლებების მიმართულებით, ეკონომიკის თავისუფლების, ყველა მიმართულებით ჩვენ გვაქვს სრული პროგრესი ბოლო რვა წლის განმავლობაში“, – განაცხადა ირაკლი ღარიბაშვილმა.