საქართველო მსოფლიო სასკოლო ჩემპიონატზე კალათბურთში
საქართველო, თბილისი - 18:50 | 17.06.2016 ნანახია: 1100
დღეს ქართული დელეგაცია გაემგზავრა ესტონეთში, ქალაქ ტალინში, სადაც იმართება მსოფლიო სასკოლო ჩემპიონატი კალათბურთში 3X3. ჩემპიონატში მონაწილეობის უფლება მოიპოვეს 2015 წლის საქართველოს სასკოლო სპორტულ ოლიმპიადის გამარჯვებულმა ქ. ზუგდიდის N2 საჯარო სკოლის გოგონათა და ქ. ქუტაისის N3 საჯარო სკოლის ვაჟთა გუნდებმა.
ჩვენი დებიუტანტები შეხვდებიან 30-მდე სკოლის გუნდს, მსოფლიოს სხვადასხვა ქვეყნიდან, რაც მათთვის ნამდვილი გამოწვევა და ძალიან კარგი გამოცდილება იქნება.
კენჭისყრის შედეგად, გოგონათა და ვაჟთა გუნდები 3 ჯგუფად დაიყო. საქართველოს გოგონათა და ვაჟთა გუნდები A ქვეჯგუფში მოხვდა. საქართველოს ბავშვთა და მოსწავლე ახალგაზრდობის სპორტის ეროვნული ფედერაციის სახელით, ვულოცავთ ქართველებს მსოფლიო ასპარეზზე გასვლას და ვუსურვებთ წარმატებას მათ საკმაოდ ძლიერ გუნდებთან მოუწევთ შეხვედრა.
საქართველოს დელეგაციის ხელმძღვანელები არიან ბავშვთა და მოსწავლე ახალგაზრდობის სპორტის ეროვნული ფედერაციის პრეზიდენტი ლევან კიკალიშვილი და სპორტისა და ახალგაზრდობის საქმეთა სამინისტროს წარმომადგენელი თორნიკე გაჩეჩილაძე.
#სასკოლოსპორტულიოლიმპიადა #ISFWSC2016
მოკლე ინფორმაცია ოლიმპიადის შესახებ:
სასკოლო სპორტული ოლიმპიადა2015 წლიდან ტარდება და ყოველწლიური ხასიათი აქვს. ისერთ-ერთი მნიშვნელოვანი ფაქტორია ქვეყანაში მასობრივი სპორტის განვითარების ხელშეწყობისა და ახლგაზრდობის ჩართულობის მონაცემთა ზრდის თვალსაზრისით. და მისი მიზანია ბავშვობიდანვე გააღვივოს სპორტისადმი სიყვარული, გამოავლინოს ნიჭიერი ახალგაზრდები და მოამზადოს ისინი დიდი სპორტისთვის. ოლიმპიადა იმართება მთელი საქართველოს მასშტაბით, ყველა რეგიონის ყველა მუნიციპალიტეტში, საქართველოს კერძო და საჯარო სკოლების გუნდებს შორის.
2016 წლის ოლიმპიადაში მონაწილეობას იღებს 1200 სკოლის 6000-ზე მეტი გუნდი, რაც უპრეცედენტოა თავისი მასშტაბებით და სამომავლოდ კიდევ უფრო მეტ მოსწავლეს აქვს მონაწილეობის სურვილი.
პროექტი მნიშვნელოვანია იმითაც, რომ ბავშვთა და მოსწავლე ახალგაზრდობის სპორტის ეროვნული ფედერაცია, საერთაშორისო სასკოლო სპორტის ფედერაცია ISF-ის წევრია და ოლიმპიადაზე გამარჯვებული სკოლის გუნდები, პირველად საქართველოს ისტორიაში, მიემგზავრებიან მსოფლიო სასკოლო ჩემპიონატებზე. აღნიშნული უფრო ამაღლებს ბავშვების მოტივაციას, რომ ჩაერთონ ოლიმპიადაში.
სასკოლო სპორტული ოლიმპიადა ტარდება საქართველოს სპორტისა და ახალგაზრდობის საქმეთა სამინისტროს, საქართველოს განათლების და მეცნიერების სამინისტროსა და საქართველოს ეროვნული ოლიმპიური კომიტეტის მხარდაჭერით.