სექტემბერში წლიური ინფლაციის დონემ 5,2 % შეადგინა

საქართველო, თბილისი - 11:22 | 02.10.2015
ნანახია: 1030

2015 წლის სექტემბერში 2014 წლის სექტემბერთან შედარებით ინფლაციის დონემ საქართველოში 5,2 პროცენტი შეადგინა.

“საქსტატის“ მონაცემებით, წლიური ინფლაციის ფორმირებაზე ძირითადი გავლენა იქონია ფასების ცვლილებამ შემდეგ ჯგუფებზე:

სურსათი და უალკოჰოლო სასმელები: 12-თვიან პერიოდში ფასები გაიზარდა 4,2 პროცენტით და ჯგუფის წვლილმა წლიური ინფლაციის მთლიან მაჩვენებელში 1,28 პროცენტული პუნქტი შეადგინა. აღსანიშნავია ფასების მნიშვნელოვანი მატება შემდეგ ქვეჯგუფებზე: ხილი და ყურძენი (28,8 პროცენტი) და ზეთი და ცხიმი (13,1 პროცენტი);

ჯანმრთელობის დაცვა: ფასები გაიზარდა 9,8 პროცენტით, რამაც წლიური ინფლაციის მთლიან მაჩვენებელზე 0,92 პროცენტული პუნქტით იქონია გავლენა. ფასები ძირითადად გაიზარდა სამედიცინო პროდუქციის, აპარატურისა და მოწყობილობების ქვეჯგუფზე (21,2 პროცენტი);

ალკოჰოლური სასმელები, თამბაქო: ჯგუფში დაფიქსირდა ფასების 13,4-პროცენტიანი ზრდა, რაც ინფლაციის მთლიან მაჩვენებელზე 0,70 პროცენტული პუნქტით აისახა. ფასები გაიზარდა თამბაქოს ნაწარმზე (13,4 პროცენტი) და ალკოჰოლურ სასმელებზე (12,4 პროცენტი);

ავეჯი, საოჯახო ნივთები და მორთულობა, სახლის მოვლა-შეკეთება: ჯგუფზე ფასები გაიზარდა 11,6 პროცენტით, რამაც წლიურ ინდექსზე 0,73 პროცენტული პუნქტით იქონია გავლენა.  




არქივი

მოგვძებნე Facebook-ზე