სამთავრობო პროგრამის ფარგლებში „აწარმოე საქართველოში“ „ჯი-ემ-პი“ საწარმოო შესაძლებლობებს გააფართოებს

საქართველო, თბილისი - 17:55 | 01.10.2015
ნანახია: 1420

სამთავრობო პროგრამის ფარგლებში „აწარმოე საქართველოში“, საქართველოს ეკონომიკისა და მდგრადი განვითარების სამინისტროს სსიპ მეწარმეობის განვითარების სააგენტოს მხარდაჭერით კომპანია შპს „ჯი-ემ-პი“ საწარმოო შესაძლებლობების გაფართოებას შეძლებს.

 შპს „ჯი-ემ-პის“ საქმიანობის ძირითად მიმართულებას ფარმაცევტული პროდუქციის წარმოება წარმოადგენს, პროდუქციის სარეალიზაციო ბაზარი  კი  საქართველოს, უზბეკეთის, ყირგიზეთის, ტაჯიკეთის, სომხეთის, მოლდავეთის, ყაზახეთის, უკრაინისა და ბელორუსიის მასშტაბითაა განსაზღვრული. აღნიშნული პროექტის ფარგლებში, კომპანია „ჯი-ემ-პი“  გამოშვებული პროდუქტის პორტფელის გაფართოებას, ექსპორტის მოცულობის გაზრდას, ახალი საექსპორტო ბაზრების მოძიებასა და საწარმოს წარმადობის ზრდით ახალი პრეპარატების წარმოების შესაძლებლობის გაჩენას ისახავს მიზნად. 

 აღსანიშნავია, რომ საწარმო  აკმაყოფილებს „სათანადო წარმოების პრაქტიკის“ საერთაშორისო მოთხოვნებს, ფლობს ხარისხის მართვის სისტემის საერთაშორისო სტანდარტებთან შესაბამისობის დამადასტურებელ სერთიფიკატს და არის  „ფარმაცევტული ინჟინერინგის საერთაშორისო ასოციაციისა“  და „სუფთა ტექნოლოგიების პროფესიული გაერთიანების“ წევრი. შპს „ჯი-ემ-პიში“ დასაქმებულთა ოდენობა 290 პირს უტოლდება, პროქტის ფარგლებში განხორციელებული ინვესტიციის ჯამური მოცულობა კი 2,6 მლნ. დოლარს შეადგენს.

 შეგახსენებთ, რომ პროგრამა „აწარმოე საქართველოში“ პირველი სახელმწიფო პროგრამაა, რომელიც მიზნად ისახავს მეწარმე-სუბიექტების მხარდაჭერის, ახალი საწარმოების შექმნის/არსებული საწარმოს გაფართოების ან გადაიარაღების გზით საქართველოში მეწარმეობის განვითარებას. ამავდროულად, პროგრამა ქვეყნის მასშტაბით სამეწარმეო კულტურის დანერგვას ემსახურება და კერძო სექტორის კონკურენტუნარიანობის გაუმჯობესებისა და ქვეყნის საექსპორტო პოტენციალის ზრდისკენაა მიმართული.

 




არქივი

მოგვძებნე Facebook-ზე