ლაშა ბექაურმა ტოკიოს გრანდ სლემზე ბრინჯაოს მედალი მოიპოვა

ტოკიოში მიმდინარე ძიუდოს გრანდ სლემზე ლაშა ბექაური (90კგ) ბრინჯაოს მედლის მფლობელი გახდა. ქართველმა ძიუდოისტმა  მესამე ადგილისთვის ბრძოლაში 2016 წლის ოლიმპიური ჩემპიონი, იაპონელი მაშუ ბეიკერი გაფრთხილებებით დაამარცხა.

ტოკიოს გრანდ სლემზე დღეს ხუთი ქართველი ძიუდოისტი ასპარეზობდა, რომელთაგანაც ფინალურ ბლოკში მხოლოდ ლაშა ბექაური გადავიდა.

ტურნირზე გამომსვლელი ოთხი ქართველი ქალი ძიუდოისტი ეთერ ლიპარტელიანი, ნინო ლოლაძე (ორივე 57 კგ), ეთერ ასკილაშვილი (63 კგ) და ნინო გულბანი (70 კგ) შეჯიბრებას ადრეულ ეტაპზე გამოეთიშნენ და ტოკიოს გრანდ სლემი უმედლოდ დაასრულეს.

4 დეკემბერს ტოკიოს ტურნირზე ერთი ქართველი ძიუდოისტი – მძიმეწონოსანი სოფიო სომხიშვილი იასპარეზებს.