ელტონ ჯონი შვილებისთვის ”ვერცხლის კოვზის” მიცემას არ აპირებს

ელტონ ჯონი შვილებისთვის მთელი ქონების დატოვებას არ აპირებს, რადგან მათ შრომის დაფასება უნდა ისწავლონ. ამის შესახებ The Daily Mirror-ი წერს. მომღერლის თქმით, ბიჭებმა საარსებო საშუალება თავად უნდა გამოიმუშაონ, თუმცა მშობლებისგან დახმარებას მაინც მიიღებენ.

”რა თქმა უნდა, მე და ჩემი მეუღლე ბავშვებს ფინანსურად უზრუნველყოფთ, მაგრამ მათთვის ”ვერცხლის კოვზის” მიცემას არ ვაპირებთ - ეს საშინელებაა, რამაც, შესაძლოა მათი ცხოვრება დაანგრიოს”, - განაცხადა მუსიკოსმა. (ბრიტანელებს აქვთ გამოთქმა ”ვერცხლის კოვზთან ერთად დაიბადა”, - რაც ბედნიერს, მდიდარს ნიშნავს)

ელტონ ჯონი აღნიშნავს, რომ იმის მიუხედავად, რომ მისი შვილები ჩვეულებრივი ბავშვები არ არიან, მათ ცხოვრებაში რაიმე ნორმალური და უბრალო მაინც უნდა იყოს. მაგალითად ფულისა და შრომის დაფასება.

The Daily Mirror-ი აღნიშნავს, რომ ელტონ ჯონის ქონება 279 მლნ დოლარად არის შეფასებული. ელტონ ჯონი და მისი პარტნიორი დევიდ ფერნიში 2014 წლის დეკემბერში დაქორწინდნენ. მათ ორი ვაჟი - ხუთი წლის ზახარი და სამი წლის ელაიჯა სუროგატი დედისგან შეეძინათ.