ეროვნულ გალერეაში აზერბაიჯანელი მხატვრის ფარჰად ხალილოვის ნამუშევრები გამოიფინება

საქართველო, თბილისი - 17:40 | 29.02.2016
ნანახია: 1115

 

1 მარტს 19:00 საათზე, საქართველოს ეროვნული მუზეუმის დიმიტრი შევარდნაძის სახელობის ეროვნულ გალერეაში აზერბაიჯანელი მხატვრის ფარჰად ხალილოვის ნამუშევრები გამოიფინება. სპეციალურად გამოფენის გახსნისთვის თბილისს თავად მხატვარიც ეწვევა. ღონისძიებას საქართველოს კულტურისა და ძეგლთა დაცვის მინისტრი მიხეილ გიორგაძე, საქართველოს ეროვნული მუზეუმის დირექტორი დავით ლორთქიფანიძე და სხვა მოწვეული სტუმრები დაესწრებიან.

ექსპოზიციაზე წარმოდგენილი იქნება თანამედროვე აზერბაიჯანელი მხატვრის სხვადასხვა ჟანრში შესრულებული ფერწერული ტილოები. ფარჰად ხალილოვი 1987 წლიდან დღემდე აზერბაიჯანის მხატვართა კავშირის თავმჯდომარეა; მას არაერთი პერსონალური გამოფენა ჰქონდა ლონდონში, ბერლინში, მოსკოვში; მონაწილეობა აქვს მიღებული სხვადასხვა ქვეყნის 40-მდე ჯგუფურ გამოფენაში; მისი ნამუშევრები ინახება აზერბაიჯანის, უკრაინის, რუსეთის, ლიტვის, გერმანიის, ჩინეთის სახელმწიფო მუზეუმებისა და აზერბაიჯანის მხატვართა საერთაშორისო კონფედერაციის კოლექციებში; ასევე, აშშ-ს, გერმანიის, პოლონეთის, საფრანგეთის და მექსიკის კერძო კოლექციებში; ფარჰად ხალილოვს სხვადასხვა დროს მიღებული აქვს მრავალი ჯილდო. დღეს, მისი ნამუშევრები იყიდება სოტბისა და ფილიპ დე პიურის აუქციონებზე. ფარჰად ხალილოვმა შეძლო საბჭოთა იდეოლოგიისაგან თავისუფალი, საკუთარი სტილის შექმნა და კავკასიელის მდიდარი ბუნებისა და შინაგანი სამყაროს საინტერესო კუთხით წარმოჩენა.

გამოფენა, რომელიც 22 მარტამდე გაგრძელდება, საქართველოს კულტურისა და ძეგლთა დაცვის სამინისტროს, აზერბაიჯანის რესპუბლიკის კულტურისა და ტურიზმის სამინისტროს, აზერბაიჯანის ხელოვნების ეროვნული მუზეუმისა და საქართველოს ეროვნული მუზეუმის მხარდაჭერით იმართება.

 

 




არქივი

მოგვძებნე Facebook-ზე