თბილისში ქართველი შინდლერების მემორიალი გაიხსნა
საქართველო, თბილისი - 19:00 | 13.05.2022 ნანახია: 152
დღეს თბილისში, ქართველი შინდლერების მემორიალი გაიხსნა. მემორიალი ვარკეთილში, სესილია თაყაიშვილის ქუჩაზე მდებარე ახლად გაშენებულ პარკში „ისრაელის სახლის“ ინიციატივით განთავსდა. ორგანიზაციის ინიციატივითვე, პარკში, 30-მეტრიან კედელზე მოიხატა ანა ფრანკის სურათი. „ისრაელის სახლის“ ინიციატივა თბილისის საკრებულოს წევრის რევაზ სოხაძის მხარდაჭერით განხორციელდა.
სპეციალურად ღონისძიებაზე დასასწრებად თბილისს ეწვია ისრაელის დელეგაცია, ქნესეთის საქართველოს პარლამენტთან მეგობრობის ჯგუფის თავმჯდომარის დავიდ ბიტანის ხელმძღვანელობით.
ღონისძიებას ესწრებოდა საქარველოს პარლამენტის წევრი, ისრაელის პარლამენტთან მეგობრობის ჯგუფის ხელმძღვანელი გივი მიქანაძე, ისრაელის საელჩოს წარმომადგენელი, თბილისის საკრებულოს წევრები რევაზ სოხაძე და ნინო ვარდოსანიძე, „ისრაელის სახლის“ ხელმძღვანელი იციკ მოშე, სტუმრები ისრაელიდან და ქართული საზოგადოების წარმომადგენლები.
„ისრაელის სახლის“ მიმართვის საფუძველზე აღნიშნულ პარკს ქართველი შინდლერების (სერგი მეტრეველი, მიხეილ კედია, გრიგოლ ფერაძე და სხვ.) სახელი მიენიჭება.
ღონისძიება გაიხსნა საქართველოსა და ისრაელის ჰიმნებით, რომელიც ახალგაზრდა ქართველმა მომღერალმა ქრისტი ჯაფარიძემ შეასრულა.
დამსწრე საზოგადოებას სიტყვით მიმართა „ისრაელის სახლის“ ხელმძღვანელმა და მადლობა გადაუხადა ვარკეთილის მაჟორიტარ დეპუტატს თბილისის საკრებულოში, რევაზ სოხაძეს მხარდაჭერისთვის.
„დღეს ისრაელში იყო ტერაქტის მცდელობა და ამ დროს, როდესაც ისრაელელი ტელევიზიით უყურებს, ერთი მხრივ, რა ხდება და, მეორე მხრივ, მეგობარ ქვეყანაში იხსნება ქართველი შინდლერების პარკი, კედელზე მოიხატა ანა ფრანკის სურათი, ეს არის ძალიან მნიშვნელოვანი ჩვენი ხვალინდელი ურთიერთობებისთვის. ეს არის რეალური ნაბიჯები ჩვენი ქვეყნების კავშირებისთვის", - განაცხადა იციკ მოშემ.
ქნესეთის წევრის, საქართველოს პარლამენტთან მეგობრობის ჯგუფის ხელმძღვანელის დავიდ ბიტანის თქმით, ის ბედნიერია, რომ ამ მემორიალის გახსნაში მონაწილეობს. „მემორიალი ეძღვნება ისრაელის ერთ-ერთ ყველაზე რთულ და ებრაელი ხალხისთვის ძალიან მტკივნეულ პერიოდს. ჩვენს მომავალ თაობებს უნდა ვასწავლოთ ჩვენი კავშირისა და მეგობრობის შესახებ. ყველა ის ქართველი, რომელმაც ერთი ადამიანი მაინც გადაარჩინა, ჩვენ უნდა ვაღიაროთ და მის შესახებ მომავალ თაობებს მოვუყვეთ", - განაცხადა ისრაელელმა პარლამენტარმა.
საკრებულოს წევრმა რევაზ სოხაძემ მემორიალის გახსნას ქალაქისთვის მნიშვნელოვანი მოვლენა უწოდა.
„ძალიან მნიშვნელოვანია ქალაქისთვის, რომ, ერთი მხრივ, კიდევ ერთხელ პატივი მივაგოთ ჰოლოკოსტის შედეგად დაზარალებულებს და ებრაელ ერს, რომელმაც ძალიან დიდი მსხვერპლი გაიღო კაცობრიობის ისტორიაში; აგრეთვე, ჩვენს თანამემამულეებს, რომლებმაც წვლილი შეიტანეს ებრაელი ხალხითვის ყველაზე მძიმე პერიოდში მათ დასახმარებლად და გადასარჩენად“- განაცხადა რევაზ სოხაძემ.
დამსწრე საზოგადოებას სიტყვით მიმართა ისრაელის დელეგაციის წევრმა, ქალაქ რიშონ ლეციონის მერმა რაზ კინსტლიხმა. მისი თქმით, მისმა უშუალო წინაპრებმა ჰოლოკოსტი გამოიარეს და ეს დღე მისთვის განსაკუთრებით ემოციურია.
ღონისძიებაზე სიტყვით გამოვიდა პარლამენტარი გივი მიქანაძე, რომელმაც განაცხადა, რომ მიესალმება ინიციატივას, პარკს ქართველი შინდლერების სახელი დაერქვას. სიტყვით ასევე გამოვიდნენ ისრაელის საელჩოს წარმომადგენელი და ონის მუნიციპალიტეტის ყოფილი მერი დავით ჩიკვაიძე. ამ უკანასკნელის მხარდაჭერითა და „ისრაელის სახლის“ ინიციატივით, 2 წლის წინ ონში, ისრაელის მემორიალური მუზეუმის იად ვაშემის მიერ „მართალად“ აღიარებული სერგი მეტრეველის მემორიალი აღიმართა.
ღონისძიება დასრულდა ებრაული სიმღერით „ელი, ელი“.
პოლიტიკა
- ჩვენთვის ცნობილია ინფორმაცია აშშ-ის საელჩოს ტერიტორიაზე დაპირისპირების შესახებ. ვსწავლობთ ამ ინფორმაციას - ამერიკის საელჩო
- ქართველებს უსაზღვროდ ბევრი რამის გაკეთება შეუძლიათ ერთობით, როდესაც ერთიანდებიან ევრო-ატლანტიკური მომავლისთვის. მე კი გარწმუნებთ, რომ აშშ გააგრძელებს თქვენს გვერდით დგომას - დეგნანი
- საფრანგეთში საქართველოს ელჩი თანამდებობას ტოვებს
- სუბარი, ყაველაშვილი და ხუნდაძე მორიგ განცხადებას ავრცელებენ
საზოგადოება
- "შინ ევროპისკენ" წარმომადგენლებზე თავდასხმები დანაშაულის ნიშნებს შეიცავს - სახალხო დამცველი
- გორში მოსახლეობასთან შეხვედრის დროს ბადრი ჯაფარიძეს მწვანილი ესროლეს
- „ნამდვილი ლომები“ მძღოლებისთვის - MAN-ის წარმატება Red Dot Design Award-ის კონკურსში
- უსასრულო გარანტია სატვირთო ავტომობილების აკუმულატორებსა და საბურავებზე
კონფლიქტები
- რუსმა ოკუპანტებმა ზარდიაანთკარში მავთულხლართების გაბმა განაახლეს
- ცხინვალის მარიონეტული რეჟიმი აცხადებს, რომ "ყაზბეგი საქართველოს მიერ არის ოკუპირებული"
- ოკუპირებულმა აფხაზეთმა იემენისგან „დიპლომატიური“ ურთიერთობების დამყარებისა და „ურთიერთაღიარების“ წინადადება მიიღო
- პუტინმა ოკუპირებულ ცხინვალთან ე.წ. ორმაგი მოქალაქეობის შესახებ შეთანხმებას მოაწერა ხელი
მედიცინა
- ვაქცინაციისთვის 50 000 შპრიცი უკვე საქართველოშია - ჯანდაცვის სამინისტრო
- Pfizer-მა და BioNTech-მა ევროპის სამედიცინო სააგენტოს მიმართეს ვაქცინის დამტკიცების თხოვნით
- მესამე ტალღას არ გამოვრიცხავთ - ეკატერინე ტიკარაძე
- Moderna-ს კორონავირუსის საწინააღმდეგო ვაქცინამ 95%-იანი ეფექტურობა აჩვენა - წინასწარი მონაცემები