ნატო-მ ხმელთაშუა ზღვაში მასშტაბური სამხედრო წვრთნები დაიწყო

საქართველო, თბილისი - 15:51 | 25.01.2022
ნანახია: 175

ხმელთაშუა ზღვაში ნატო-ს წვრთნები დაიწყო ამერიკული ავიამზიდის დამრტყმელი ჯგუფისა და ალიანსის წევრების ძალების მონაწილეობით, რომლებიც ერთობლივ მანევრებს შეიმუშავებენ.

პენტაგონის პრესსპიკერ ჯონ კირბის განცხადებით, წვრთნები „ნეპტუნის დარტყმა“ 2020 წლიდან ტარდება და განკუთვნილი არ არის უკრაინასთან დაკავშირებული რომელიმე სცენარისთვის.

თეთრი სახლის პრესსპიკერმა ჯენ ფსაკიმ 24 იანვარს განაცხადა, რომ სწავლება „აჩვენებს ტრანსატლანტიკური ალიანსის  ერთიანობას, შესაძლებლობებს და ძალას.“

ავიამზიდ „ჰარი ტრუმენის“ დამრტყმელ ჯგუფს მეთაურობას ნატო გაუწევს. სწავლება 4 თებერვლამდე გაგრძელდება.  

ნატოს-პრესმდივან ოან ლუნგესკუს განცხადებით, ეს „ცივი ომის“ შემდეგ პირველი შემთხვევაა, როდესაც ამერიკული ავიამზიდი ნატო-ს მეთაურობას დაექვემდებარება.

წრვთნები უკრაინაში რუსეთის შესაძლო აგრესიის ფონზე ჩატარდება.

ნატო-მ 24 იანვარს განაცხადა, რომ აღმოსავლეთ ევროპაში გზავნის დამატებით ძალას, მათ შორის ხომალდებსა და გამანადგურებლებს, ხოლო უკრაინაში რუსეთის შეჭრის შემთხვევაში სამხედრო ძალა, შესაძლოა კიდევ გაზარდოს.

„ჩვენ გვყავს ავიამზიდის ჯგუფი ნატო-ს მეთაურობით. ეს არ არის ბალტიის ზღვაში, მაგრამ რა თქმა უნდა, მას ევროპის უსაფრთხოებისათვის დიდი მნიშვნელობა აქვს, ამიტომ ჩვენ  ასე გავმაგრდით“, - განაცხადა ნატო-ს გენერალურმა მდივანმა იენს სტოლტენბერგმა.

შეგახსენებთ, გასულ კვირას რუსეთის თვადაცვის სამინისტრომ განაცხადა, რომ მსოფლიოს სხვადასხვა რეგიონში, მათ შორის ხმელთაშუა ზღვაში წვრთნებს ჩაატარებს. დაგეგმილია, რომ სწავლებაში, რომელიც იანვარ-თებერვალშია დაგეგმილი, მონაწილეობას მიიღებს 140 ხომალდი და დამხმარე გემი, 60 საფრენი აპარატი და 10 ათასამდე სამხედრო მოსამსახურე.

 

 




არქივი

მოგვძებნე Facebook-ზე