ბაიდენმა ირანის წინააღმდეგ სანქციები გაახანგრძლივა

საქართველო, თბილისი - 18:16 | 06.03.2021
ნანახია: 214

აშშ-ის პრეზიდენტმა ჯო ბაიდენმა ირანის წინააღმდეგ გაახანგრძლივა სანქციები, რომელიც 1995 წლიდან არის დაწესებული. „ირანის ხელისუფლების ქმედებები და პოლიტიკა კვლავინდებურად წარმოადგენს უკიდურეს საფრთხეს შეერთებული შტატების ეროვნული უსაფრთხოების, საგარეო პოლიტიკისა და ეკონომიკისათვის“, - წერია დოკუმენტში, რომელიც თეთრი სახლის ვებგვერდზე გამოქვეყნდა.

აშშ-სთვის საფრთხეს წარმოადგენს ირანის „რაკეტებისა და სხვა ასიმეტრიული და ჩვეულებრივი შეიარაღების გავრცელება და დამზადება, რეგიონალური აგრესიის კამპანია, ტერორისტული დაჯგუფებების მხარდაჭერა და ისლამური რევოლუციის გუშაგთა კორპუსისა და მისი თანამოზარეების მავნებლური საქმიანობა“. დოკუმენტში აღნიშნულია, რომ ირანის საწინააღმდეგო სანქციების ვადა 2021 წლის 15 მარტის შემდგომი პერიოდისთვის არის გახანგრძლივებული.

აშშ ირანის საწინააღმდეგო სანქციებს ყოველ წელს ახანგრძლივებს, თუმცა ექსპერტებმა ყურადღება მიაქციეს იმ ფაქტს, რომ ამ ჯერზე აღნიშნული გადაწყვეტილება მიღებულია ირანთან საერთაშორისო ბირთვულ შეთანხმებაში აშშ-ის შესაძლო დაბრუნების ფონზე. ამის პირობა ბაიდენმა წინასაარჩევნო კამპანიის დროს დადო.

დონალდ ტრამპის ინიციატივით ვაშინგტონმა შეთანხმება 2018 წელს დატოვა. ირანი კი საპასუხოდ, ეტაპობრივად ჩამოშორდა ვალდებულებებს, კერძოდ ურანის გამდიდრების საკითხში. აშშ მოითხოვს, რომ ირანმა დაიწყოს შეთანხმების პირობების დაცვის პროცესი, რის შემდეგაც შეერთებული შტატები მზად არის შეამსუბუქოს სანქციები.

ევროკავშირმა მზადყოფნა გამოთქვა, რომ აღნიშნულ საკითხს შეთანხმების მონაწილე ქვეყნების არაფორმალურ შეხვედრაზე განიხილავდა. აშშ დათანხმდა, მაგრამ თეირანმა უარი თქვა. ირანის საგარეო საქმეთა სამინისტროს ოფიციალურმა წარმომადგენელმა საიდ ჰათიბზადემ განმარტა, რომ ირანი ვერ ხედავს მსგავსი შეხვედრის აუცილებლობას, რადგან ვაშინგტონის პოზიციაში არაფერი შეცვლილა.

 




არქივი

მოგვძებნე Facebook-ზე