უკიდურესად შემაშფოთებელია ვახო სანაიაზე თავდასხმა, ასეთ ქმედებებზე სახელმწიფოს პასუხი უნდა იყოს მკაცრი - ლომჯარია

საქართველო, თბილისი - 15:24 | 25.02.2021
ნანახია: 378

სახალხო დამცველი ნინო ლომჯარია ტელეკომპანია "ფორმულას" ტელეწამყვანის ვახო სანაიაზე თავდასხმას უკიდურესად შემაშფოთებელს უწოდებს.

ნინო ლომჯარიას განცხადებით, სახელმწიფომ მკაცრი რეაგირება უნდა მოახდინოს.

"უკიდურესად შემაშფოთებელია ჟურნალისტ ვახო სანაიაზე თავდასხმა. ვახო სანაიას განცხადებით, თავდამსხმელებმა ჟურნალისტური საქმიანობის გამო, შეურაცხყოფა მიაყენეს და ფიზიკურად გაუსწორდნენ მას და მის თანმხლებ პირებს.

ამ ტიპის ქმედებების მიმართ სახელმწიფოს პასუხი უნდა იყოს მკაცრი. ჟურნალისტის პროფესია და მისი დამოუკიდებლობა სახელმწიფოს დემოკრატიულობის უმნიშვნელოვანესი ნიშანია. ქვეყანაში უნდა არსებობდეს ინფორმაციის გავრცელების თავისუფალი შესაძლებლობა, მიუხედავად მისი შინაარსისა. თუკი ჟურნალისტს თავს ესხმიან მისი საქმიანობიდან გამომდინარე, ეს დანაშაულებრივი ქმედება ადეკვატურ და მკაცრ რეაგირებას საჭიროებს, რათა სამომავლოდ თავიდან იქნას აცილებული მსგავსი შემთხვევები.

საქართველოს სისხლის სამართლის კოდექსი კრძალავს როგორც ჟურნალისტური საქმიანობისთვის ხელშეშლას, ისე პირის დევნას მისი სიტყვის, აზრის, საზოგადოებრივი ან პროფესიული მოღვაწეობის მიზეზით. პირის მიმართ დანაშაულის ჩადენა მისი შეხედულების გამო, დანაშაულის ზოგადი დამამძიმებელი გარემოებაა.

მოვუწოდებთ შინაგან საქმეთა სამინისტროს, აწარმოოს ეფექტური გამოძიება, იმსჯელოს სპეციფიკური შემადგენლობის გამოკვეთაზე და უზრუნველყოს პასუხისმგებელ პირთა ადეკვატური დასჯა", - აცხადებს სახალხო დამცველი.

ვახო სანაიას თავდასხმის ფაქტზე პოლიციამ 3 პირი დააკავა.


პოლიტიკა



არქივი

მოგვძებნე Facebook-ზე