პოლიციამ პარლამენტთან 2 აქტივისტი დააკავა

საქართველო, თბილისი - 17:33 | 28.11.2020

ნანახია: 796

პოლიციამ პარლამენტთან 2 აქტივისტი დააკავა. მოძრაობა "სირცხვილიას" განცხადებით, დაკავებულები არიან ნათია ლეთოდიანი და შუშანა მაცაბერიძე. აქციაზე დაშავდა კიდევ 2 აქტივისტი.

საქართველოს საგარეო საქმეთა სამინისტროსა და პარლამენტის შენობებთან, "ევროპული საქართველოს" წევრმა, ელენე ხოშტარიამ და სამოქალაქო აქტივისტებმა, პროტესტის ნიშნად საბჭოთა სიმბოლიკები - ნამგალი და ურო დახატეს.

აქტივისტები აპროტესტებენ რუსეთის საგარეო საქმეთა სამინისტროს განცხადებით, რომელიც ზურაბ აბაშიძისა და გრიგორი კარასინის შეხვედრის შემდეგ, გავრცელდა.

რუსეთის საგარეო უწყების განცხადებაში ნათქვამია, რომ შეხვედრაზე მხარეების მიერ "დადასტურდა ორმხრივი განწყობა 2019 წელს მომხდარი ცნობილი ანტირუსული პროვოკაციის უარყოფითი შედეგების აღმოსაფხვრელად, რომელიც ქართველმა ნაციონალისტებმა მოაწყვეს".

განცხადებაში ასევე ვკითხულობთ, რომ "წინასაარჩევნო კამპანიის დროს რადიკალური წრეების მიერ აქტიურად გაჟღერებული რუსოფობიური რიტორიკა წარსულს ჩაბარდება".

შეგახსენებთ, ზურაბ აბაშიძესა და კარასინს შორის შეხვედრა გუშინ, ონლაინფორმატში ჩატარდა.