კორონავირუსის ახალი შემთხვევებიდან ერთი შემოტანილია, ხუთი დადასტურებულ შემთხვევასთან კონტაქტი, ერთის წყარო ჯერ დაუდგენელია

საქართველო, თბილისი - 13:16 | 07.08.2020
ნანახია: 301

თბილისის ინფექციური საავადმყოფოს სამედიცინო დირექტორის, მარინა ეზუგბაიას ინფორმაციით, კორონავირუსის შვიდი ახალი შემთხვევიდან ერთი იმპორტირებულია, ხუთი დადასტურებულ შემთხვევასთან კონტაქტში მყოფი პირია, ერთი შემთხვევის წყარო ჯერ უცნობია და ეპიდემიოლოგიური კვლევები მიმდინარეობს.

„გუშინდელი მონაცემებით, ქვეყანაში კორონავირუსის 1206 დადასტურებული შემთხვევა იყო, დაგვემატა შვიდი და დღევანდელი მონაცემებით, გვაქვს 1213 შემთხვევა.
შვიდი ახალი შემთხვევიდან ერთი იმპორტირებულია, ხუთი დადასტურებულ შემთხვევასთან კონტაქტში მყოფი პირია და მხოლოდ ერთ შემთხვევაზე გრძელდება ეპიდემიოლოგიური კვლევა კონტაქტებისა და წყაროს დადგენის მიზნით“, – განაცხადა ეზუგბაიამ.

მისივე თქმით, საქართველოში კორონავირუსისგან გამოჯანმრთელებულთა რაოდენობა უკვე 82 პროცენტია.

„გამოჯანრთელებულების რიცხვიც შვიდით გაიზარდა, იყო 987 და ახლა არის 994. ამ მონაცემების შეჯერებით, დღესდღეობით, კოვიდცენტრებში სულ 240 პაციენტი მკურნალობს და გამოჯანრთელებულების პროცენტული რაოდენობა უკვე 82 პროცენტია. ამ მაჩვენებელმა მატება დაიწყო, რადგან აგვისტოში გამოჯანრთელებულების რაოდენობა ახალი დადასტურებული შემთხვევების რაოდნეობას აჭარბებს“, – აღნიშნა ეზუგბაიამ.

მისი თქმით, ინფექციურ საავადმყოფოში სულ 32 კოვიდინფიცირებული მკურნალობს და ყველა მათგანის ჯანმრთელობის მდგომარეობა სტაბილურია.

„ჩვენს ცენტრში 38 შემთხვევა იყო, გუშინ გამოჯანრთელდა ექვსი. ახალი პაციენტი არ მიგვიღია და გვყავს 32 დადასტურებული შემთხვევა. მათი ჯანმრთელობის მდგომარეობა სტაბილურია, ყველას ჯანმრთელობის მდგომარეობა საშუალო და საშუალოზე მსუბუქია“, – აღნიშნა ეზუგბაიამ.




არქივი

მოგვძებნე Facebook-ზე