აშშ საქართველოსთვის გამოყოფილი დახმარების 15 პროცენტს აჩერებს

საქართველო, თბილისი - 13:20 | 07.07.2020
ნანახია: 671

შეერთებული შტატების კონგრესის წარმომადგენელთა პალატას წარედგინა ორპარტიული კანონპროექტი 2021 წლის საგარეო ოპერაციების დაფინანსების შესახებ.

კანონპროექტი მოიცავს 2021 წელს საქართველოსთვის გამოყოფილი ფინანსური დახმარების შესახებ ინფორმაციას.

ნათქვამია, რომ მომავალ წელს საქართველო ამერიკის შეერთებული შტატებისგან სულ მცირე 132 025 000 აშშ დოლარს მიიღებს, თუმცა ამ თანხის 15% შესაძლოა შეჩერდეს, ვიდრე წარმომადგენელთა პალატას არ წარედგინება სახელმწიფო მდივნის მოხსენება, სადაც დადასტურებული იქნება საქართველოს მთავრობის ქმედითი ნაბიჯები დემოკრატიის გაძლიერების მიმართულებით.

"ამ კანონპროექტით გამოყოფილი თანხის 15%-ის გაცემა არ შეიძლება იყოს სავალდებულო, ვიდრე სახელმწიფო მდივანი არ დაადგენს, რომ საქართველოს ცენტრალური ხელისუფლება ქმედით ნაბიჯებს დგამს:

ა) დემოკრატიული ინსტიტუტების გაძლიერების მიმართულებით;

ბ) მთავრობაში კორუფციის წინააღმდეგ ბრძოლის, მათ შორის ანტიკორუფციული კანონებისა და რეგულაციების გამოყენების მიმართულებით;

გ) კერძო სექტორში კანონის უზენაესობისა და საერთაშორისო სტანდარტებთან შესაბამისობის უზრუნველსაყოფად, რაც გულისხმობს უცხოური ბიზნესის თავისუფალ, შევირწორების გარეშე საქმიანობას, რათა სრულად შეძლონ კომერციული და ფინანსური სარგებლის მიღება, რასაც საქართველოში განხორციელებული ინვესტიციები მოუტანს", - ნათქვამია კანონპროექტში.

კანონპროექტში აღნიშნულია, რომ დაფინანსების შეჩერება არ გავრცელდება იმ პროგრამებზე, რომლებიც მიმართულია საქართველოში დემოკრატიის გაძლიერების, კანონის უზენაესობის, სამოქალაქო საზოგადოებისა და მედიის განვითარებისკენ.


პოლიტიკა



არქივი

მოგვძებნე Facebook-ზე