მისურის შტატში არეულობის დროს პოლიციის უფროსი მოკლეს

ქალაქ მოლინ-ეიკერსის პოლიციის უფროსი და სენტ-ლუისის (მისურის შტატი) გადამდგარი კაპიტანი დევიდ დორნი არეულობის დროს მოკლეს, რომელიც აფროამერიკელ ჯორჯ ფლოიდის გარდაცვალებას მოჰყვა. იუწყება ტელეარხი ABC.

ადგილობრივი პოლიციის კომისრის ჯონ ჰეიდენის თქმით, 77 წლის დორნი სენტ-ლუისში იმ დროს მოკლეს, როდესაც სავარაუდო  ლომბარდის ძარცვის აღკვეთას ცდილობდა.

რამდენიმე დღეა არ წყდება ანტირასისტული საპროტესტო გამოსვლები  შეერთებული შტატების სხვადასხვა ქალაქში.

ანტირასისტული საპროტესტო გამოსვლები ქალაქ მინეაპოლისში, პოლიციელების მიერ დაკავებული 46 წლის აფროამერიკელი ჯორჯ ფლოიდის გარდაცვალებას მოჰყვა.

დაკავების კადრებში, ჩანს, რომ მიწაზე დაგდებულ ჯორჯ ფლოიდს პოლიციელი კისერზე მუხლს აჭერს, მიუხედავად იმისა, რომ დაკავებული შველას ითხოვს და ამბობს, რომ სუნთქვა უჭირს. მოგვიანებით ფლოიდი საავადმყოფოში გარდაიცვალა.

"ამერიკის ხმის" ცნობით, შოვინის წინააღმდეგ სასამართლოში შეტანილი საჩივრის თანახმად, ის ფლოიდს კისრის არეში მუხლით 8 წუთი და 42 წამი აწვებოდა.

30 მაისს აღნიშნულ საქმეზე დააკავეს პოლიციელი, დერეკ შოვინი, რომელსაც წინასწარი განზრახვის გარეშე მკვლელობის ბრალდება წარუდგინეს. აქციის მონაწილეები ითხოვენ, რომ პოლიციელს უფრო მძიმე მუხლი წაუყენონ, ასევე პასუხი აგონ პოლიციის სხვა ოფიცრებმაც, რომლებიც ფლოიდის დაკავებაში მონაწილეობდნენ.