განსაკუთრებით საგანგაშოა, როდესაც გამოცემა ზუსტად მიუთითებს, რომ ჰაკერების ჯგუფი მუშაობდა საქართველოდან - ხატია დეკანოიძე

საქართველო, თბილისი - 18:16 | 10.05.2020
ნანახია: 362

ოპოზიცია საქართველოში კრემლთან დაკავშირებული ჰაკერული ჯგუფის შესახებ გავრცელებულ ინფორმაციას ეხმაურება და მას შემაშფოთებელს უწოდებს.

როგორც "ნაციონალური მოძრაობის" წევრმა ხატია დეკანოიძემ აღნიშნა, ნაცვლად იმისა, რომ ხელისუფლებამ მსგავსი ფაქტები აღკვეთოს, ის ანტიდასავლურ პროპაგანდას აფინანსებს. მისი თქმით, განსაკუთრებით საგანგაშოა, როდესცა გამოცემა ზუსტად მიუთითებს იმას, რომ ჰაკერები საქართველოდან მუშაობდნენ.

"ეს ჰიბრიდული ომი არის მნიშვნელოვანი გამოწვევა და საფრთხე ცივილიზებული სამყაროსთვის. განსაკუთრებით საგანგაშოა, როდესაც გამოცემა ზუსტად მიუთითებს, რომ ჰაკერების ჯგუფი მუშაობდა საქართველოდან. ეს ნიშნავს იმას, რომ, სამწუხაროდ, ამ ჰიბრიდული ომის ერთ-ერთ პლატფორმად უკანასკნელ პერიოდში გადაიქცა ჩვენი ქვეყანა. ეს არის ეროვნული ინტერესების დაზიანება, ჩვენი ქვეყნის ევროატლანტიკური მისწრაფებების დაზიანება და ყველაზე მნიშვნელოვანი ისაა, რომ სახელმწიფო, რომელმაც უნდა აღკვეთოს მსგავსი ქმედებები და რომელიც საქმის კურსში უნდა იყოს, რომ ყოველდღიურად საქართველოდან ხორციელდება მსგავსი ქმედებები, არათუ არაფერს აკეთებს, არამედ პირდაპირ აფინანსებს, მაგალითად, ანტიდასავლურ პროპაგანდას და მე შეგახსენებთ, რომ რამდენიმე თვის წინ „ფეისბუკის“ ადმინისტრაციამ დაბლოკა „ქართულ ოცნებასთან“ დაკავშირებული ძალიან ბევრი ის გვერდი, რომელიც პირდაპირ ანტიდასავლურ პროპაგანდას ეწეოდა. საქართველოში ოპერირებს ჰაკერების ჯგუფი და ამის შესახებ ან არაფერი იცის სახელმწიფო უსაფრთხოების სამსახურმა ან მიზანმიმართულად ხელს უწყობს რუსული ჰიბრიდული ომისთვის საქართველოს პლატფორმად გადაქცევას", - განაცხადა ხატია დეკანოიძემ.

შეგახსენებთ, რომ დღეს გამოცემა Daily Mail-მა გაავრცელა ინფორმაცია, რომ საქართველოში ბაზირებულია რუსეთის უსაფრთხოების სამსახურთან დაკავშირებული კიბერჰაკერთა ჯგუფი, რომელმაც ბრიტანეთიდან სამედიცინო კვლევების ჩანაწერები მოიპარა.




არქივი

მოგვძებნე Facebook-ზე