ავღანეთში ჩამოვარდნილი თვითმფრინავი აშშ-ის სამხედრო-საჰაერო ძალებს ეკუთვნის

პენტაგონმა დაადასტურა ინფორმაცია, რომ გუშინ, ავღანეთში ჩამოვარდნილი თვითმფრინავი შეერთებული შტატების საჰაერო ძალებს ეკუთვნოდა. ამის შესახებ ავღანეთში აშშ-ის შეიარაღებული ძალების პრესსპიკერმა სონი ლეჯეტმა განაცხადა.

მისივე თქმით, ჯერჯერობით არ არსებობს არანაირი ნიშანი იმისა, რომ თვითმფრინავი ჩამოაგდეს.

"თვითმფრინავი Bombardier E-11A ჩამოვარდა ავღანეთის ღაზნის პროვინციაში. კატასტროფის მიზეზი ჯერ არ არის დადგენილი. თალიბანის განცხადება, თვითმფრინავის ჩამოგდებაზე პასუხისმგებლობის აღებასთან დაკავშირებით არასწორია", - განაცხადა პრესსპიკერმა.

მანამდე ტელეკომპანია Fox News-ი წყაროზე დაყრდნობით იუწყებოდა, რომ ამ თვითმფრინავზე ხუთამდე ადამიანი იმყოფებოდა.

მას შემდეგ, რაც გავრცელდა ინფორმაცია ავიაკატასტროფის შესახებ, თალიბანმა მასზე პასუხისმგებლობა აიღო და განაცხადა, რომ ბორტზე მაღალი რანგის ამერიკელი სამხედრო ოფიცრები იმყოფებოდნენ.

ავღანეთში თვითმფრინავის ჩამოვარდნის შესახებ გუშინ გახდა ცნობილი. სხვადასხვა წყაროები იუწყებოდნენ, რომ თვითმფრინავი ავღანურ ავიაკომპანია Ariana Afghan Airlines-ს ეკუთვნოდა და ბორტზე 80-ზე მეტი ადამიანი იმყოფებოდა. მოგვიანებით, ავიაკომპანიამ კატეგორიულად უარყო ეს ინფორმაცია.