ყველანაირ არჩევნებს წააგებს ივანიშვილი, თუ ოპოზიციას სწორი სტრატეგია ექნება - იაგო ხვიჩია

ყველანაირ არჩევნებს წააგებს ბიძინა ივანიშვილი, თუ ოპოზიციას სწორი სტრატეგია ექნება, - ამის შესახებ პოლიტიკური გაერთიანება „გირჩის“ ერთ-ერთმა ლიდერმა იაგო ხვიჩიამ ჟურნალისტებს განუცხადა.

მისი თქმით, „გირჩი“ გეგმავდა, პროპორციული არჩევნების შემთხვევაში სხვადასხვა პარტიასთან, მათ შორის „ქართულ ოცნებასთან“ თანამშრომლობას, თუმცა გუშინდელი დღის შემდეგ „ქართულ ოცნებასთან“ თანამშრომლობა შეუძლებელია.

„ბიძინა ივანიშვილმა დადო სიტყვა, რომელიც დაარღვია. ახლა მიმდინარეობს პროცესი – ქართველი ხალხი ბიძინა ივანიშვილის წინააღმდეგ. ახლა მთავარია, ოპოზიციურმა ძალებმა თანამშრომლობა ვისწავლოთ, რომ არჩევნებამდე დავადგინოთ, რა ხდება არჩევნების შემდეგ . ყველანაირ არჩევნებს წააგებს ბიძინა ივანიშვილი, თუ ოპოზიციას სწორი სტრატეგია ექნება – ჩვენ ვარკვევთ, ვინ არის მართლა ოპოზიცია; ვამბობთ, რომ მართლა ოპოზიცია ერთმანეთს ხელს არ უშლის“, – განაცხადა იაგო ხვიჩიამ.

„გუშინ ივანიშვილმა დაკარგა ინგლისურად მოლაპარაკე ბოლო დეპუტატები“, - აღნიშნა ხვიჩიამ.

„ახლა მიდის ის პროცესები, რომელიც აწყობს ჩვენს მტერს, რუსეთს. ახლა გვაქვს შანსი ოპოზიციას, დავსხდეთ და დავილაპარაკოთ.  თუ ამ სისტემით მოგვიწევს არჩევნების ჩატარება, მთავრობის ერთ წარმომადგენელს ოპოზიციამ ერთიანი კანდიდატი უნდა დაუპირისპიროს“, – აღნიშნა იაგო ხვიჩიამ.