არც ერთ კონკრეტულ მომავალ ნაბიჯზე გადაწყვეტილება საბოლოოდ არ მიგვიღია - თამარ ჩუგოშვილი

საქართველო, თბილისი - 13:18 | 15.11.2019
ნანახია: 199

არც ერთ კონკრეტულ მომავალ ნაბიჯზე გადაწყვეტილება საბოლოოდ არ მიგვიღია, - ამის შესახებ დეპუტატამა თამარ  ჩუგოშვილმა განაცხადა. მისი თქმით, საპარლამენტო უმრავლესობის ყოფილ წევრებს სამომავლო გეგმებთან დაკავშირებით დამატებითი დრო და კონსულტაციები სჭირდებათ.

მისივე თქმით, საპარლამენტო თანამდებობისა და უმრავლესობის დატოვების გადაწყვეტილება რთული იყო.

„არ უარვყოფ, ამ გადაწყვეტილების მიღება მარტივი არ ყოფილა. გუშინ საკმარისად ავხსენით, რამ გამოიწვია ამ გადაწყვეტილების მიღება და ამ ნაბიჯის გადადგმა საჭიროდ რატომ ჩავთვალეთ. რაც შეეხება სამომავლო გეგმებს, მე და ჩემს კოლეგებს დამატებით გარკვეული დრო გვჭირდება იმისთვის, რომ უფრო დეტალურად გესაუბროთ სამომავლო გეგმებთან დაკავშირებით. ამაზე საუბრისგან ჯერ თავს ვიკავებ, რადგან ჩემს კოლეგებთან მეტი კონსულტაცია მჭირდება. ამას ბევრი დრო არ დასჭირდება“, – განაცხადა ჩუგოშვილმა.

ჩუგოშვილის განცახდებით, სამომავლო გეგმებზე გადაწყვეტილება ჯერჯერობით მიღებული არ არის.

„არც ერთ კონკრეტულ მომავალ ნაბიჯზე ჯერჯერობით გადაწყვეტილება საბოლოოდ არ მიგვიღია. ამიტომ, არ მინდა არასწორი ინფორმაცია მოგაწოდოთ, არც თქვენ და არც საზოგადოებას. არ მინდა, ვიჩქარო. გარკვეული დრო გვჭირდება, არც ისე ბევრი, იმისთვის, რომ უფრო მეტი კონკრეტიკა მოგაწოდოთ“, – განაცხადა ჩუგოშვილმა.

პროპორციულ საარჩევნო სისტემაზე გადასვლის შესახებ, საპარლამენტო უმრავლესობის მიერ მომზადებულმა საკონსტიტუციო ცვლილებებმა პარლამენტში პირველი მოსმენით კენჭისყრაზე ხმების საკმარისი რაოდენობა ვერ მიიღო.

ამის შემდეგ უმრავლესობის რიგები და საპარლამენტო თანამდებობები დატოვეს თამარ ჩუგოშვილმა, თამარ ხულორდავამ, სოფიო ქაცარავამ, გიორგი მოსიძემ, ირინა ფრუიძემ, დიმიტრი ცქიტიშვილმა,ზაზა ხუციშვილმა, მარიამ ჯაშმა და გიორგი ბეგაძემ და „ქართული ოცნება - კონსერვატორების ფრაქციამ.

 




არქივი

მოგვძებნე Facebook-ზე