ფილმის "და ჩვენ ვიცეკვეთ" კინოჩვენების ხელის შეშლის შემთხვევაში პოლიცია იმოქმედებს საკუთარი მანდატის ფარგლებში - შსს

საქართველო, თბილისი - 14:40 | 06.11.2019
ნანახია: 102

შინაგან საქმეთა სამინისტრო ფილმის „და ჩვენ ვიცეკვეთ“ კინოჩვენების წინააღმდეგ საპროტესტო აქციის ორგანიზატორებს კანონის დაცვისკენ მოუწოდებს.

"შინაგან საქმეთა სამინისტროს ერთ-ერთი ამოცანაა ადამიანის უფლებების და თავისუფლებების დაცვა, განურჩევლად ადამიანის სქესის, რელიგიური კუთვნილების, სექსუალური ორიენტაციის, გენდერული იდენტობის, პოლიტიკური შეხედულების და სხვა ნიშნისა.

გავრცელებული ინფორმაციით, 2019 წლის 8, 9 და 10 ნოემბერს თბილისსა და ბათუმში მდებარე რამდენიმე კინოთეატრში მხატვრული ფილმის „და ჩვენ ვიცეკვეთ“ (And Then We Danced) პრემიერა იმართება. ასევე, საზოგადოების გარკვეული ჯგუფების მხრიდან კეთდება განცხადებები კინოჩვენების ხელშემშლელი ღონისძიებების შესახებ.

შინაგან საქმეთა სამინისტრო უზრუნველყოფს როგორც საზოგადოებრივი უსაფრთხოებისა და მართლწესრიგის დაცვას, ასევე, თითოეული ადამიანის გამოხატვის თავისუფლებას, რომელიც არ სცდება კანონით დასაშვებ ფარგლებს.

მოვუწოდებთ ყველას, დაიცვან კანონის მოთხოვნები. წინააღმდეგ შემთხვევაში, პოლიცია იმოქმედებს საკუთარი მანდატის ფარგლებში და სამართალდარღვევის თითოეული ფაქტი დაუყოვნებლივ იქნება აღკვეთილი", აღნიშნულია შსს-ს განცხადებაში.




არქივი

მოგვძებნე Facebook-ზე