იენს სტოლტენბერგმა თურქეთს ძლიერი და მნიშვნელოვანი მოკავშირე უწოდა

ნატო-ს გენერალურმა მდივანმა იენს სტოლტენბერგმა ჟურნალისტების შეკითხვა იმის შესახებ თუ როგორ იმოქმედებს ალიანსი აშშ-ის მიერ თურქეთის მიმართ სანქციების დაწესების შემთხვევაში უპასუხოდ დატოვა.

სტოლტენბერგმა დღეს თურქეთთან მოლაპარაკება გამართა. პრეს კონფერენციაზე ერთ-ერთი საკითხი ეხებოდა სენატორების მუქარას ანკარის წინააღმდეგ სირიის ჩრდილოეთით სამხედრო ოპერაციის გამო.

„ვფიქრობ, არ იქნება სწორი რომ ამ ჰიპოთეტურ სიტუაციებთან დაკავშირებით სპეკულირება დავიწყო. შემიძლია ვთქვა, რომ თურქეთი ნატო-ს ძლიერი, ერთგული მოკავშირეა, რომელიც ძალიან მნიშვნელოვანია ჩვენი კოლექტიური თავდაცვისა და საერთო მისიებისთვის, მათ შორის ტერორიზმთან ბრძოლაში“, - განუცხადა მან ჟურნალისტებს.

სტოლტენბერგმა აღნიშნა, რომ ნატო-სა და თურქეთს ათწლეულებზე აგებული, ღრმა ურთიერთობები აქვთ და ალიანსი თურქეთს თავდაცვითი სარაკეტო სისტემებით ეხმარება.

 „ჩვენ თურქეთს ასევე მხარს ვუჭერთ საჰაერო და საზღვაო ძალების გაზრდაში, ამ წლების განმავლობაში ნატო-მ 5 მლრდ დოლარი გამოყო, თურქეთის სამხედრო ობიქეტებისთვის, მათ შორის მნიშვნელოვანი ინფრასტრუქტურისთვის, როგორიცაა სამხედრო, საზღვაო ბაზები და რადიოლოკაციური სადგურები“, - განაცხადა სტოლტენბერგმა.