ცხინვალის საოკუპაციო რეჟიმი დუმას მიმართავს აღიაროს 1920 წელს საქართველოს მიერ ოსი ხალხის გენოციდი

ცხინვალის საოკუპაციო რეჟიმი აპირებს მიმართოს რუსეთის სახელმწიფო დუმას 1920 წელს საქართველოს მიერ ოსი ხალხის გენოციდის აღიარების შესახებ.

ეს საკითხი ოკუპირებული სამხრეთ ოსეთის ე.წ. პარლამენტის სხდომაზე განიხილეს, მიიღეს მიმართვის სამი ვარიანტი, რომელზეც იმუშავებენ და ერთიან დოკუმენტს შეიმუშავებენ. 

მანამდე რუსეთის პრეზიდენტმა ვლადიმირ პუტინმა განაცხადა, რომ საქართველოს ახლანდელმა ხელისუფლებამ კარგად უნდა იცოდეს აფხაზ და ოს ხალხთან ურთიერთობის ისტორია, თუ კი სურს მათთან ურთიერთობების დალაგება. პუტინმა ასევე აღნიშნა, რომ ქართველებმა 1919 -20 წლებში გერმანიის ჯარების დახმარებით მოახდინეს ოსეთის ოკუპაცია და სასტიკად მოექცნენ ოს ხალხს. მისი თქმით ეს არის „სწორედ ის, რასაც დღეს გენოციდი ეწოდება“.

ოკუპირებული სამხრეთ ოსეთის ე.წ. საგარეო საქმეთა მინისტრმა დიმიტრი მედოევმა განაცხადა, რომ 2020 წელს აღინიშნება ოსი ხალხის „გენოციდის“ ასი წლისთავი, რომელიც 1919-20 წლებში დამოუკიდებელი საქართველოს ხელისუფლებამ „ჩაიდინა“. ოსი სეპარატისტების ერთ-ერთმა ლიდერმა აღნიშნა, რომ 1919-20 წლებში თითქოს დაიღუპა 5 ათასზე მეტი მშვიდობიანი მოქალაქე, 40 ათასამდე ადამიანი კი იძულებული გახდა თავიანთი საცხოვრებელი ადგილი დაეტოვებინა.