საქართველოს ტერიტორიულ წყლებში ნატო-ს ხომალდები შემოვიდნენ

საქართველო, თბილისი - 14:03 | 01.04.2019
ნანახია: 351

საქართველოს ტერიტორიულ წყლებში ნატო-ს ხომალდები შემოვიდნენ. ნატო-ს მუდმივმოქმედი მეორე საზღვაო შენაერთის მეთაური, კომოდორი ბაუდევაინ ბუტსი საქართველოს სანაპირო დაცვის ხელმძღვანელს შეხვდება. ასევე, გაიმართება სამუშაო შეხვედრები, კულტურული და სპორტული ღონისძიებები.

ფოთის პორტში სტუმრებს დახვდნენ სანაპირო დაცვის დეპარტამენტის დირექტორი, პოლონეთის ელჩი საქართველოში, ადგილობრივი თვითმმართველობისა და ნატო-ს სამეკავშირეო ოფისის წარმომადგენლები.

მეორე საზღვაო შენაერთის შემადგენლობაში შედის: საფლაგმანო ხომალდი „HNLMS Evertsen“ (ნიდერლანდების სამეფო), „TCG Yildirim“ (თურქეთის რესპუბლიკა), “BGS DRAZKI” (ბულგარეთი) და ”ROS Regele Ferdinand” (რუმინეთი). ნატოს მუდმივმოქმედ მეორე საზღვაო შენაერთს კომოდორი ბაუდევაინ ბუთსი ხელმძღვანელობს.

ნატო-ს მუდმივმოქმედი მეორე საზღვაო შენაერთის ხომალდები და საქართველოს სანაპირო დაცვის ორი ხომალდი – „დიოსკურია“ და „ოჩამჩირე“ ერთობლივ წვრთნებს ჩაატარებენ. მასში მონაწილეობას ასევე, მიიღებენ ნიდერლანდების, თურქეთის, რუმინეთისა და ბულგარეთის მცურავი საშუალებები.

ნატო-ს მუდმივმოქმედი მეორე საზღვაო შენაერთის (SNMG2) ხომალდები საქართველოს ტერიტორიულ წყლებს 4 აპრილს დატოვებენ.




არქივი

მოგვძებნე Facebook-ზე