ოკუპირებულ აფხაზეთში "ჯაშუშობის" ბრალდებით საქართველოს მოქალაქე დააკავეს

ოკუპირებული აფხაზეთის დე ფაქტო უშიშროების სამსახურის განცხადებით, გალის სოფელ ნაბაკევში მცხოვრები საქართველოს მოქალაქე 1998 წელს დაბადებული ქრისტინე თაკალანძე დააკავეს.

საოკუპაციო რეჟიმის მტკიცებით, დაკავებული "საქართველოს სპეცსამსახურების სასარგებლოდ ჯაშუშობდა".

როგორც იუწყებიან, ქრისტინე თაკალანძე 20 ივლისს დააკავეს. მის წინააღმდეგ აღძრულია "სისხლის სამართლის საქმე ჯაშუშობის მუხლით".

"რადიო თავისუფლების" ინფორმაციით, დაკავებული გოგო სოხუმში, ე.წ. უშიშროების სამსახურის იზოლატორშია. მისივე ცნობით, ახალგაზრდა ქალი ნაბაკევში, მამასთან ერთად ცხოვრობს და გალიდან ზუგდიდში ხშირად ჩადიოდა.

მათივე ცნობით, აფხაზმა სამართალდამცავებმა გოგო მაშინ დააკავეს, როცა საოკუპაციო ხაზის გავლით, ზუგდიდში გამგზავრებას ცდილობდა.