კაპიტალური ბაზრის რეფორმასთან დაკავშირებით საქართველოს ვიცე-პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა სამუშაო შეხვედრა გამართა, რომელსაც ესწრებოდნენ ეროვნული ბანკის ვიცე-პრეზიდენტი არჩილ მესტვირიშვილი, ეკონომიკისა და მდგრადი განვითარების მინისტრის მოადგილე ირმა ქავთარაძე, საპენსიო რეფორმის სამსახურის უფროსი ოთარ ძიძიკაშვილი, ასევე ფინანსთა სამინისტროსა და საქართველოს საფონდო ბირჟის წარმომადგენლები.

შეხვედრაზე განხილულ იქნა ეკონომიკისა და მდგრადი განვითარების სამინისტროს, ეროვნული ბანკისა და ფინანსთა სამინისტრო მიერ შემუშავებული კაპიტალური ბაზრის კონცეფცია. საფონდო ბირჟის მენეჯმენტმა მოისმინა მთავრობის სამოქმედო გეგმა, რაც მოიცავს სააქციო ფასიანი ქაღალდების, კორპორატიული ობლიგაციების, დერივატივებისა და სხვა ინსტრუმენტების დანერგვას. ბირჟის წარმომადგენლებმა პოზიტიურად შეაფასეს მთავრობის სამოქმედო გეგმა და წარმოადგინეს თავიანთი ხედვა აღნიშნულ საკითხებთან დაკავშირებით.

როგორც შეხვედრაზე დიმიტრი ქუმსიშვილმა აღნიშნა,  კაპიტალური ბაზრის განვითარება წარმოადგენს უმნიშვნელოვანეს ინსტრუმენტს და წინაპირობას ეკონომიკური აქტივობის ზრდისათვის. მისი განცხადებით, კაპიტალური ბაზრის გააქტიურება შესაძლებლობას მისცემს კომპანიებს მოიზიდონ გრძელვადიანი ფულადი რესურსი ადგილობრივ ვალუტაში, რაც ამ ეტაპზე პრობლემას წარმოადგენს. შეხვედრაზე ითქვა, რომ წლის ბოლომდე დაგეგმილია სხვადასხვა მიმართულებით საკანონმდებლო აქტების შემუშავება და ბირჟის ინფრასტრუქტურული გაუმჯობესება,  რაც თვისობრივად ახალ გარემოს შექმნის კაპიტალური ბაზრის განვითარებისთვის.