ხორავას ქუჩაზე მკვლელობის საქმეს კიდევ ერთი დაზარალებული - ლევან დადუნაშვილის ოჯახი ჰყავს, რომელიც სერგი კაპანაძეს გუშინ არც გახსენებია - ეკა ბესელია

საქართველო, თბილისი - 16:20 | 21.09.2018
ნანახია: 92

არის ლევან დადუნაშვილის ოჯახი, რომელიც დროებითი საგამოძიებო კომისიის თავმჯდომარე სერგი კაპანაძეს გუშინ არც გახსენებია, – ამის შესახებ პარლამენტის სესიაზე, იურიდიული კომიტეტის თავმჯდომარე ეკა ბესელიამ განაცხადა.

მან მომხდარის გამო ორივე ოჯახს მიუსამძიმრა და კომისიის მანდატსა და მისი შექმნის მნიშვნელობაზე ისაუბრა.

„პირველ რიგში, მინდა, დავიწყო სამძიმრით და არა მხოლოდ  ერთ, დავით სარალიძისოჯახს მივუსამძიმრო, არამედ დადუნაშვილების ოჯახსაც, რომელიც გუშინ არ გახსენებია სერგი კაპანაძეს, რამდენჯერაც ახსენებდა ერთ დაზარალებულს. ამ საქმეს ჰყავს კიდევ ერთი დაზარალებული ოჯახი და არა მხოლოდ ეს ოჯახი. როდესაც დაზარალებულებზე ვსაუბრობთ, როგორმე მაშინ მაინც უნდა მოვახერხოთ და პოლიტიკური განწყობებისგან გავთავისუფლდეთ“, – განაცხადა ბესელიამ.

მისი თქმით, დროებითი საგამოძიებო კომისიის შექმნას, შემდგომში საპარლამენტო კონტროლის თვალსაზრისითაც დიდი პოლიტიკური მნიშვნელობა ჰქონდა.

„მინდა, კომისიის საქმიანობაზე ვთქვა ორიოდე სიტყვა იმ ფონზე, როდესაც საპარლამენტო ტრადიციას არ აქვს გამოცდილება ასეთ საქმეებზე საგამოძიებო კომისიის შექმნის. მაშინ, როცა პარლამენტში უნდა შექმნილიყო საგამოძიებო კომისია, როგორც წესი, არ იქმნებოდა. ამ კომისიის შექმნის გადაწყვეტილებას ჰქონდა არა მხოლოდ ამ ერთი საქმის, არამედ შემდგომში საპარლამენტო კონტროლის თვალსაზრისით, ძალიან დიდი პოლიტიკური მნიშვნელობა. გადაწყვეტილებამ, რომლითაც კომისიაში უმრავლესობით „ევროპულ საქართველო“ იყო, აჩვენა, რომ ასეთი არ უნდა იყოს საგამოძიებო კომისია. ჩემთვის, რომელიც ამ პროცესებს შიგნიდან ვაკვირდებოდი და ჩართული ვიყავი, სამწუხარო იყო, მენახა, რამდენად პოლიტიზებული იყო სრულად პროცესი“, – განაცხადა ბესელიამ.

თუმცა, მისი თქმით, ეს სწორედ საპასუხისმგებლო ეტაპია, როდესაც პოლიტიკოსებმა უნდა მოახერხონ  და პოლიტიკური განწყობებისგან გათავისუფლდნენ.

„სამწუხაროდ, კომისიამ ეს ვერ შეძლო. ქადაგიძისა და ჭაიას დაწერილი, შემდეგ კი, კომისიის წევრი იურისტების მიერ კორექტირებული დასკვნით აჩვენა, რომ იმდენად ვერ გაექცა პოლიტიკურ განწყობას კომისიის უმრავლესობა, მათ ვერ მოახერხეს, მერაბიშვილის ეპიზოდი მაინც არ შესულიყო ამ საქმეში და ეს ხელოვნურად დანახული ბმა, პოლიტიკური ელფერის ყველაზე მკაფიო მაგალითი არ გამხდარიყო. ვფიქრობ, წერტილი აქ უნდა დავსვათ, ყველაფერი გასაგებია“, – განაცხადა ეკა ბესელიამ.




არქივი

მოგვძებნე Facebook-ზე